Linda bekkpressa mætt á svæðið!!!

2012-01-31T18:55:00.000Z

Fyrsta bloggið eftir fæðingu Magdalenu!

Eins og flestir vita finnst mér ótrúlega gaman að skrásetja hlutina og halda utan um allar myndir á myndasíðunni okkar. Þetta er hins vegar orðið miklu flóknara núna með komu facebook, persónulega finnst mér miklu skemmtilegra að halda utan um þetta forláta blogg mitt heldur en að setja eitthvað þangað inn og þess vegna ætla ég að reyna að vera dugleg að skrifa eitthvað hérna og virkja vefdagbókina á myndasíðunni en ég sé að ég hef ekki látið neitt framhjá mér fara í þroska Áru svo það er eins gott að skrá allt sem hún litla Magdalena gerir:) Annars gæti ég átt á hættu að hún kvarti líkt og Svava sem segir að það muni enginn neitt síðan hún var lítil! Ég kom mér allaveganna í það að skrá fæðingarsöguna hennar í vefdagbókina á myndasíðunni!

Magdalena litla dafnar ótrúlega vel og hefur verið ljúf sem lamb frá fæðingu og ég krossa allt sem hægt er að krossa um að það haldist áfram. Hún er orðin mánaðargömul og maður furðar sig alltaf á því hvað tíminn líður hratt og þess vegna nauðsynlegt að njóta hverrar stundar því fyrr en varir verður hún orðin eins og tæplega fimm ára unglingurinn á heimilinu sem nennir ekki að vakna á morgnana og lokar hurðinni þegar maður kemur að vekja hana:)

Frá því við komum af spítalanum hefur Magdalena haldið uppteknum hætti hvað varðar drykkju, svefn og hægðir en þetta er jú það sem horft er á í fari ungabarna. Hún er búin að vera dugleg að drekka frá fyrstu mínútu og þurfti ekki að láta kenna sér hvernig á að sjúga þessar túttur og hefur því fengið slagorðið "Lena er dugleg á spena". Hún fékk góða dóma í fimm daga skoðuninni þrátt fyrir að vera svona nett eins og læknirinn orðaði það enda ekkert nema tröllvaxin 18 marka drengjabörn í skoðun á sama tíma og hún sem er bara petit á franska vísu.

Hún hefur verið að þyngjast um 300-350 gr. á viku sem telst gott að mati ungbarnaeftirlitsins. Hvað varðar svefn tekur hún mikið tillit til foreldra sinna sem eru jú á þrítugsaldri en ekki 24 ára unglingar líkt og síðast;) Þess vegna hefur hún sofið vel þessar fyrstu rúmlega 30 nætur af lífi sínu og er að sofna svona um eitt að meðaltali og hefur sífellt verið að lengja tímann í þessum fyrst dúr en í morgun drakk hún ekki fyrr en 6:30 og síðan ekkert fyrr en rúmlega 9. Þrátt fyrir að óska þess heitar en allt að hægt sé að kalla þetta einhverja rútínu veit ég betur og þetta getur auðvitað breyst á svipstundu en er á meðan er! Ég held líka að barn nr. 2 komist fyrr í einhvern gír því barn nr. 1 er auðvitað alltaf til staðar og við erum öll komin hérna á ról milli átta og níu á morgnana þar sem klónin þurfa að fara til vinnu og í leikskóla.

Hvað varðar hægðir er hún ekkert að spara gulu skiturnar og kemur þeim frá sér oft á dag ásamt háværum frethljóðum, þetta eins og allir foreldrar þekkja gleður mikið sem og öll rop sem hún kemur frá sér - þetta er auðvelt líf. Magdalena hefur hingað til ekki ælt neitt að undanskildum þremur gusum sem hún hefur tekið, það er kærkomið að þurfa ekki alltaf að vera með bleyju við hönd til að þurrka upp ælu og sparar líka þvott en af honum er feikinóg verandi fjögur í fjölskyldu.

Nú veit ég ekki hversu margir skemmta sér við þennan lestur en ég mun reyna að halda honum innan myndsíðunnar framvegis. Þar má líka finna restina af janúar myndum en hér að neðan er smá brotabrot en við gátum loksins farið út að ganga í gær eftir mikla ófærð en nýi kagginn er að gera mjög góða hluti og mamman hæstánægð með þetta samvinnuverkefni fjölskyldu og vina að láta nýjan vagn verða að veruleika, hann mun síðan bara ganga í erfðir til að nýta hann sem best:)

Ára klára heldur uppteknum hætti stóru systur og virðist ekki fá nóg af því að knúsa og kyssa Magdalenu og segja hvað hún sé nú mesta krútt í öllum heiminum. Hún tekur yfirleitt alltaf þátt í bleyjuskiptingum þegar hún er heima og passar alltaf að kyssa hana bless þegar hún fer eitthvað. Hún er líka dugleg að skottast eftir hlutum þegar maður þarf á einhverju að halda og ég var kannski farin að ofnota þetta á tímabili því þá kvartaði hún undan því að það væri soldið erfitt að vera stóra systir og þurfa alltaf að ná í allt:) Hún er líka farin að skeina sig sjálf við aðgerðir nr. 2 þannig að hún er svo gott sem orðin alveg sjálfbjarga!

Þetta var alltof sumt að sinni!

Komin í fína kjólinn frá Rögnu sinni

Eins mánaða blómarós:)

Prufukeyra nýja vagninn með Hörpu og Svövu

Flottar í fallega Laugardalnum

Systur horfa á barnatímann

Kósý stemning í fæðingarorlofi á Laugarnesveginum

LærdómsAndri

2011-12-19T01:27:00.001Z

Nokkrar myndir síðan um helgina...

Ekki nema 12 dagar í litla skott

Ára spennt yfir þessu og ofurdugleg að hjálpa til að raða öllum fötunum í fínu kommóðurnar

Ferlíkið í allri sinni mynd!

Allt að smella í Búddhaherberginu

Kommóðuverk AFO hreint út sagt glæsilegt eftir nokkurra kvölda vinnu í grunn, lökkun og samsetningu:)

Og eins og draumurinn var er nú búið að græja þetta herbergi, skrifa öll 77 jólakortin og pakka öllu inn - þannig að það er bara hægt að fara nokkuð slakur inn í vikuna fyrir jól:)

-Jólakúlan-

2011-12-16T22:34:00.000Z

Og ég stóðst flakkið í dag enda bíllaus!

Set hérna nokkrar myndir af klónunum mínum að grunna og lakka. Ára er náttúrulega fædd vinnukona og elskar að hjálpa til við nánast hvað sem er. Hún hamaðist alveg við grunninn og var orðin rauð í kinnum þegar við sögðum henni að nú yrði hún að fara að sofa:) AFO eyddi síðan næstu tveimur kvöldum í að lakka endalaust margar einingar eins og IKEA einum er lagið.

Ég hlýddi eiginmanninum í morgun og lagði mig aftur og það var engin smá lagning, vaknaði 13:15! Tók síðan bara rólegan dag heima, tók allt til og gekk frá þvotti og svona almennt stúss en allt í RÓLEGHEITUNUM. Held mér hafi ekki veitt af því enda eru þessir verkir sem voru byrjaðir eiginlega bara alveg hættir sem betur fer.

AFO fór á jólahlaðborð í kvöld í vinnunni sinni og ég bauð Áru og Fransisku með mér í pítsu á Ítalíu og síðan smá jólabæjarrölt sem þeim fannst nú ekki leiðinlegt. Núna taka við smá jólakortaskrif, leggja lokahönd á þann pakka og á morgun er brunch á Vox með Álfi og co. Nammi namm...

Nærfata - grunn - partý

Ára gaf sig alla í verkið

AFO orðinn svona pínu þreyttur á þessu verki:) Enda hefði ég gert þetta undir venjulegum kringum stæðum á meðan hann hefði eldað eitthvað gott fyrir mig á meðan!

Sætar vinkonur á Ítalíu

-Ég er ánægð að kommentakerfið virðist virka, var farin að efast um það en ég ætla að vera dugleg að skrifa hérna í fæðingarorlofinu:)

2011-12-16T01:12:00.005Z

Klára, klára...

Ég veit að það er töluvert gáfulegra að vera í núinu og ekki að stressa sig á hlutunum en þegar jólin eru annars vegar og barn 5 mín eftir það hugsar maður aðeins lengra fram í tímann, það er bara þannig!

Ég hlakka alveg svakalega til svona ca. á sunnudagskvöldið þegar ég mun sitja á tungunni í sófanum okkar, jafnvel þiggja fótanudd frá eiginmanninum, horfa á allar innpökkuðu gjafirnar og handskrifuðu jólakortin - líta svo inn í Búddaherbergi og tjékka á vel lökkuðu kommóðunum eftir handbragð eiginmannsins vitandi að þær eru fullar af nýþvegnum ungbarnafötum...

Ég er soldið í to do listum þessa dagana, meira svona þeir eru alls staðar en samt þarf ég að slaka á og hvíla mig inn á milli en er ekki nógu dugleg að gera það enda búin að vera með alltof mikla fyrirvaraverki og samdrætti sem mega aðeins fara að slaka á þannig að ég geti haldið jólin áður en daman kemur:)

Besta ráðið hans Andra er að fara á bílnum á morgnana og skilja mig eftir heima í stofufangelsi því annars fer ég á eitthvað flakk - þið þekkið mig, svona er ég bara gerð! Á morgun er því stefnan sett á stofufangelsi og klára að skrifa restina af jólakortunum og pakka inn tveimur síðustu gjöfunum. Don Ruth henti í mig spítalatösku með sjampói, hárnæringu, kremum, tannbursta og tannkremi, vitandi það að þrátt fyrir að vera skipulagða Linda var ekki búið að græja þessa tösku síðast þegar allt fór af stað:)

Ég lagði mig samt alveg tvisvar í dag fyrir og eftir hádegi svo ég er skynsöm þess á milli sem ég ákveð að keyra út jólakort og bruna í Eymundsson rétt fyrir lokun til að græja eina bók!

En þetta eru mjög spennandi tímar hérna í LA og heppilegt að Andri á eitt stykki "bökunardag" inni í næstu viku og hann verður vel nýttur í einhverjar útréttingar og samsetningu á eldhúsborði svo eitthvað sé nefnt:)

2011-12-10T17:51:00.002Z

Fyrsta óvinnufæra vikan liðin og ég hef svo sem ekki setið auðum höndum eins og við var að búast en rosalegur lúxus að þurfa ekki að rífa sig upp sjö á morgnana og mæta til vinnu klukkan átta.

Heilsan er mjög fín og ljósan mín spáir stærri stelpu en Ágústa Rut var en hún var algjör títla 49 cm og tæplega 13 merkur. Mér finnst ég voða mikið eins bara og þá en þetta verður spennandi því er ekki að neita!

Fékk að heyra það í vikunni að það væri gott að byrja að þvo hvað á hverju svo ég henti í nokkrar vélar og það er af nógu að taka! Mér finnst ég líka megasjóuð í barnafötum þó ég segi sjálf frá enda ekki lítil áhugamanneskja um barnafatnað í öllum stærðum, litum og gerðum:) Núna veit ég alveg upp á hár hvaða samfellur mér finnst gott að nota og sokkabuxur og leggings og svona dótarí. Ég hata það heldur ekkert að flokka og raða og skipuleggja. Nú þarf Andri bara að lakka tvær kommóður svo ég geti farið að koma þessu dóti einhvers staðar fyrir.

Hér er kominn langur to do listi fyrir vikuna því stefnan er sett á megarólega viku fyrir jól þar sem ég get helst bara legið með tærnar upp í l0ft!

Fullt af nýjum myndum á myndasíðunni og kvitt gleður:)

2011-12-06T07:58:00.004Z

"Óvinnufær með öllu"

Stendur á vottorðinu mínu fyrir Laugalæk:) Kannski ekki beint lýsingin sem á við um mig en þetta er víst staðlað ef maður ætlar að hætta að vinna áður en fæðingarorlof hefst formlega. Mér finnst samt nákvæmlega réttti tímapunkturinn núna til þess að verða svona "óvinnufær". Mjög mikilvægt að fá smá hvíld og góða aðventu eftir nokkuð annasamt haust. Ég er reyndar aðeins að kenna smá einkatíma í dansi og stærðfræði en það er bara hressandi í litlu magni.

Ég var að lesa bloggið mitt síðan á sama tíma á síðustu meðgöngu og þá höfðum við akkúrat skellt okkur í bústað og ég hafði verið með einhverja kvefdrullu og hálsbólgu og Andri síðan tekið við. Þetta er svona beisiklí eins og hefur verið undanfarna daga enda meðgöngurnar búnar að vera óskaplega líkar. Fórum í yndislega bústaðaferð með Álfrúnu, Agli og Eldi um helgina og slógum líklega heimsmet í afslöppun og megabrunchum. Þessi tvö börn smella líka alltaf saman eins og flís við rass og sváfu meira að segja saman í rúmi báðar næturnar:) Þarf að setja inn slatta af myndum sem fyrst.

Nú styttist líka heldur betur í næstu dömu en við erum búin að fara upp á Skaga og hitta frábæran lækni sem heitir Konráð og mun sjá um að skera mig og græja. Að öllu óbreyttu verðum mér trillað inn að kvöldi 28. des og skorin þann 29. des. Gummi frændi fær þá litla Gummalínu í afmælisgjöf því hann á einmitt afmæli þarna 29. des. Þetta er bara gott plan annars getur auðvitað alltaf eitthvað gerst áður en ég er voða róleg yfir því, daman búin að skorða sig fyrir langalöngu síðan og alltaf gott að vita af því að þurfa ekki fleygja sér í gólfið einhvers staðar á förnum vegi!

Ára er síðan búin að vera sérlega tillitssöm við móður sína sem er ekki jafn snör í snúingum og gengur og gerist og hjálpar ítrekað við að klæða úr skóm, sækja hluti og hjálpa til við ýmis verk. Vonandi heldur þessi velvilji áfram...

Annars er jólaandinn ríkjandi hér á Laugarnesveginum og gjafainnpökkun og jólakortagerð í fullu gangi:)

2011-11-07T15:35:00.004Z

Alls konar nýtt og skemmtilegt á www.123.is/agustarut

Rutlurnar saman:)

Afmælisvöfflustrætóferð með þessum hressu stúlkum:)

...og margt margt fleira, kjötsúpuboð, brunchar, afmælisveislur og fleira og fleira!

32 vikur að nálgast og fáránlega stutt í des en þá kemur inn nýr kennari fyrir mig í Laugalæk og aðventan verður tekin í rólegheitum:)

Tók mega-danstörn um helgina á 12 klukkustundakeppni þar sem pörin okkar stóðu sig með mikilli prýði - Norður-Evrópu mótið báða dagana um næstu helgi svo það er nóg að gera. Allar helgar eftir það eru síðan orðnar nokkuð bókaðar alveg fram á jólum og þá verður líka bara komið að því að stúlka nr. 2 líti dagsins ljós.

Ég fór í mæðraskoðun í síðustu viku og allt í toppstandi - ljósmóðir mín vildi endilega taka það fram í skýrslunni að ég myndi dans enn! Þetta er minn tími svona frá 15. viku og fram að fæðingu - gott að maður á einhvern "sinn" tíma í þessu ferli annars væri þetta alveg megaleiðinlegt:)

Annars er þessi meðganga svo fáránlega lík og Áru að það er eiginlega alveg furðulegt - finnst ég vera að upplifa alla sömu hluti aftur!

Nokkrir nýir vinir búnir að bætast í hópinn á síðustu viku - Rakel frænka eignaðist strák þann 26. okt., Helga Dögg Wiium strák þann 1. nóv. og Hjalli og Eva María hana Agnesi Ísabellu 3. nóv. Við á L92 óskum auðvitað öllum innilega til hamingju. Framundan er síðan nóg af börnum en barnasprengjan í vinahópnum er að ná hæstu hæðum um þessar mundir - man bara ekki eftir öðrum eins tíma.

Kíkið nú á myndir og kvittið fyrir innlit - það er alltaf gaman.

2011-10-30T00:44:00.002Z

Jesús er að koma sterkur inn hérna á heimilinu eftir tíðar ferðir Áru í sunnudagaskólann með Brynju vinkonu sinni. Síðast skrifaði ég um hvernig hún bjargaði mér fyrir horn með því að útskýra fyrir vinkonu sinni að Jesús hefði auðvitað sett þessa stelpu í magann á mér - ég meina hver annar!;)

Nýjasta afrek Jesú er síðan að ákveða að strákar þurfa ekki að þurrka sér eftir að þeir pissa. Þetta sagði hún við Andra eftir að hafa spurt hann af hverju strákar þyrftu ekki að þurrka sér þegar þeir væru búnir að pissa og Andri var eitthvað að reyna að útskýra það en hún greip inn í og kom með þessa fínu útskýringu: "æj Jesús hefur örugglega bara ákveðið að það ætti að vera þannig":) Og þá var það frágengið!

Samstarfskona Andra tók síðan þessa mynd af honum og þar sem Andri hefur aldrei bætt á sig aukagrammi finnst mér gaman að sjá hvernig hann mun líta út þegar kemur að því að ég þurfi að fara að kasta út einhverjum björgunarhringjum:)

Október myndir eru á leiðinni á myndasíðuna helst ekki seinna en á morgun!

2011-10-16T21:33:00.003Z

Skondnar draumfarir...

Ég veit ekki hvað fékk mig til að dreyma að ég hefði sótt um sumarstarf sem strætóbílstjóri hjá strætisvögnum Reykjavíkur en ég eyddi í það minnsta heilli nótt í aka áttunni um allan bæ! Byrjaði þannig að mig vantaði sárlega starf og fyrsta sem ég sá laust var strætóbílstjórastarf, ég sótti um og fékk starfið samdægurs. Eitthvað gekk mér nú illa að keyra þennan vagn enda flennistór og ég alveg sami stubbur og venjulega, þó alveg í strætóbílstjóra búningnum með hatt og allar græjur. Átti reyndar ansi erfitt með að opna fyrir farþegum og enn erfiðara með að loka aftur því ég fann ekki takkann til þess og keyrði því bara með opið, farþegum til mikillar mæðu og heyrðist alltaf kallað fram í: "það er opið að aftan"! Mér gekk erfiðlega að rata leiðinlega sem áttan átti að fara og var alltaf að villast og komin langt á eftir áætlun, komst þó á leiðarenda og fékk smá kaffipásu þar sem ég bað um ullarsokka því mér var svo kalt á tánum, fékk svo afhenta nýlegri týpu af vagni og kveið því mikið að leggja af stað aftur!

Orgasmic birth!

Þessi mynd var mikið rædd í jóganu í síðustu viku og ég ætla svo sem ekkert að fara út í þá sálma hvað mér finnst um það en ég var segja Andra frá þessu og sýna honum trailerinn og honum þótti þetta sérstakt og nefni það við mig að hann hefði aldrei heyrt slíkt áður, eina sem hann myndi eftir var þegar við vorum á foreldranámskeiðinu síðast og fengum að horfa á fæðingu og eins og hann orðaði það: "konan sofnaði á milli hægða" hahahaha, ég var fljót að átta mig á mismælinu og hló eins og vitleysingur og hann alveg "æj hvað heitir þetta aftur" og ég botnaði fyrir hann "þú meinar milli hríða" hahaha, hann afsakaði sig með því að það kæmi náttúrulega alveg fyrir að konur myndu kúka í fæðingu! Ég vona samt að engin lendi í því að kúka svo mikið að hún sofni á milli hægða;)

Hver kom nú með þessa stelpu í magann minn?

Ég beið eftir að þessi spurning kæmi frá dóttur minni en vinkona hennar var fyrri til og spurði hvort ég hefði verið með tvær stelpur í maganum þegar Ára var þar. Ég sagði að svo hefði nú ekki verið og þá furðaði hún sig á því hvernig þessi nýja hefði nú komist þangað - demit komið að þessu mómenti hugsaði ég en þá kom yndisleg dóttir mín mér til bjargar og sagði: "Sko Sofia, Jesús sett hana þangað!" Ég hugsaði með mér what, hvaðan hefur hún það eiginlega og spurði hver hefði verið að segja henni það og svaraði um hæl: "nú pabbi." Ég bara trúði því ekki að búddískur faðir hennar hafi ákveðið að sleppa svo léttilega frá þessari útskýringu og klína þessu á Jesús greyið:) Svo virðist heldur ekki vera því hann þvertekur fyrir þetta, einhvers staðar annars staðar frá koma því upplýsingarnar!

2011-10-09T08:27:00.002Z

Brakandi nýjar haustmyndir undir september 2011 inni á www.123.is/agustarut

2011-10-04T18:06:00.006Z

Samanburður...

23-24 ára gömul ólétt kona...

Vann á siglinganámkeiði fyrstu þrjá mánuði meðgöngunnar en kom sér merkilega vel frá ógleðinni þrátt fyrir að vera með hana stöðuga frá morgni til kvölds með tilheyrandi gusum!

Byrjaði í nýrri vinnu um haustið í Laugalækjarskóla og fann alveg vel fyrir því að vera á fyrsta ári í kennslu, var í fullu starfi og eyddi heljarinnar tíma í skipulagningu. Átti að vísu ekki barn og gat því komið heim og lagt sig í stundum þrjá klukkutíma. Var merkilega skynsöm og hélt sig við eitt starf og vann því ekkert aukalega um helgar né aðra virka daga. Stjanaði mikið við sjálfa sig með ýmsu dekri, nuddi, jóga, spa meðferðum og fleiru góðu. Vann nánast fram á síðasta dag eða 38 og hálfa viku. Lét taka óléttumyndir vikulega frá 17. viku og las nánast yfir sig af efni varðandi meðgöngu, fæðingu og ungabörn. Var mjög spennt fyrir þessu öllu saman en samt líka kvíðin enda vissi hún ekkert út í hvað hún var að fara.

28-29 ára gömul ólétt kona...

Tók maí mánuð með trompi hvað varðar ógleði og ældi nánast upp á dag áður en haldið var í vinnu í Laugalæk og var að ljúka sínum fimmta vetri þar. Var alveg fram í júlí að kljást við ógleði og losnaði ekki við hana fyrr en um ca. 14 vikur og gott betur. Byrjaði svo að vinna aftur komin um 20 vikur og aldrei hressari, orðin sjóuð á vinnustaðnum og þurfti ekki að eyða eins miklum tíma í undirbúning og skipulag og gat því kennt töluvert meira á viku eða um 31 stund. Er orðin meðeigandi í dansskóla sem kallar á aukavinnu um helgar og suma virka daga og við bætast nokkrar klukkustundir í rúmlega 100% vinnuvikuna! Á barn fyrir og því fer lítið fyrir lagningu seinnipart dags líkt og á fyrri meðgöngu sem þýðir að hún fer stundum að sofa klukkan tíu á kvöldin sem er mjög ólíkt hennar karakter. Lætur samt dekra við sig með jógatímum og ómissandi nuddi frá eiginmanninum sem sleppir varla úr degi hvað það varðar. Er þrátt fyrir að vera upptekin, skynsöm og þykist kunna að lesa í aðstæður þar sem hún er orðin of þreytt en gerir það klárlega ekki nógu oft. Ætlar alls ekki að vinna lengur en þangað til í byrjun desember sem þýðir kannski rétt um átta vikur í viðbót. Er þó búin að fá hótun frá ljósmóðurinni um að hún geti skikkað hana til að hætta fyrr ef henni sýnist svo! Hefur bara látið taka eina óléttumynd og þó komin 27 vikur á leið og á í fullu fangi með að halda tölu á vikufjöldanum, hvað þá að lesa um hvað er að gerast á hverri viku! Er bara alveg ótrúlega spennt fyrir tímunum framundan og finnst hún ef eitthvað er töluvert meira tilbúin í þetta heldur en fyrir fimm árum.

-Lindoss-

2011-09-15T15:49:00.003Z

Styður kenninguna mína um að 2011 sé frekar málið, ef það verður á annað borð hægt að velja ár;)

Mér finnst líka flott að halda mig við frumtölurnar ef út í það er farið - þó að þetta skipti svo sem engu máli þegar upp er staðið en gaman að spá og spögulera í þessu!

sbr. þessa grein

Við hjónin kræktum okkur í kvefpest þessa vikuna, AFO er að komast upp úr sinni og þá tók ég við, alltaf hressandi þessar kvefpestir:) Þætti mjög vænt um að ÁRA myndi sleppa við þetta.

Við eigum síðan bústað á Flúðum helgina 23.-25. sept. með Álfi og co. Ég veit að það verður svo hrikalega næs og gaman að ég get hreinlega ekki beðið, góður matur og drykkur, spilamennska, lestur bóka, útsof, afslappelsi og notalegheit mmmmm....

2011-09-12T19:41:00.004Z

Hitt og þetta...

Ára 4 ára: "Síðan fer litla systir bara út í vagn og við verðum bara tvær"

Þrátt fyrir spenning eru greinilega miklar pælingar um breytingar við komu þessarar nýju manneskju:)

Ára gisti síðan í fyrsta skipti hjá vinkonu sinni um helgina. Maður vanmetur þetta barn stundum alltof mikið, átti alveg von á símtali um að þetta væri ekki að ganga en gekk eins og í sögu sem betur fer:)

Ég ákvað síðan eftir miklar pælingar að skrá mig á jóganámskeið hérna í Borgartúninu, sama stað og ég fór með Áru þrátt fyrir að finnast þetta heldur væmið fyrir svona vélmenni eins og mig. Æfingarnar eru bara svo hrikalega góðar svo ég tali ekki um slökunina í lokin þar sem maður má sofna í 15-20 min ef ég man rétt. Fékk samt mátulegt refresh um væmnina þegar ég fékk póstinn um að ég mætti byrja: "Sæl og blessuð kæra Linda barnshafandi gyðja":) En gaman að því...barnshafandi gyðja - það er ég í hnotskurn!

Áran ætlar að prófa sundnámskeið en það er næsta stoppistöð í prógramminu "prófa sem flestar íþróttagreinar", nú þegar hefur dansinn, fótboltinn og fimleikar fengið falleinkunn um leið karlmaður birtist sem þjálfari, þessi elska erfði karlahræðsluna frá móður sinni en Sóley vinkona man nú vel eftir því þegar Gunna systir hennar þurfti alltaf að halda í höndina á mér fyrst þegar ég var heima hjá henni því ég var svo hrædd við bræður hennar og föður:)

En að sundinu sem er bara hérna uppi á Hrafnistu á sama stað og hjá sama kennara og við vorum í ungbarnasundi, frábært að geta labbað á staðinn og við mæðgur eigum örugglega eftir að eiga "kvolití tæm" í lauginni á þriðjudags-eftirmiðdögum.

Þessi vetur rúllar bara ljúflega af stað eins og þeir gera nú flestir nema hvað þessi er uppfullur af tilhlökkun og spenningi yfir desember mánuði og því sem framundan er.

2011-09-03T12:47:00.002Z

Þegar maður eignast almennilega myndavél verður svo þúsund sinnum skemmtilegra að taka myndir og þess vegna eru á annað hundrað myndir frá ágúst- mánuði inni á myndasíðunni:)

www.123.is/agustarut

Nú er formleg barnafataflokkun hafin á heimilinu sem excel skjalinu leiðist nú ekki, er að verða komin upp í stærð 92 og enn af nógu að taka - þó svo að meira en nóg sé til mun ég sem sérleg barnafataáhugamanneskja leyfa kaup á nokkrum flíkum í minnstu stærðum og einmitt þessa helgina er 50% afsláttur af öllu á Carter´s og við svo heppin að vera með allar þessar flugfreyjuvinkonur í kringum okkur sem ætla að ferja heim:) Ég meina hver sleppir jólakjól á 20 dollara?

Áran er spennt yfir komandi fjölgun og vildi hringja í leikskólann daginn sem hún fékk fréttirnar til að láta vita:) Næsta sem við vissum var að hún hafði sagt öllum að hún ætti von á systur og einnig að hún ætti að heita María! Þar vorum við nú ekki með í ráðum en hún sagði okkur þetta síðan seinna um daginn og bætti um betur með því að segja eins og ekkert væri sjálfsagðara að hún ætti að heita María Rut. Þá var tekið smá spjall um að foreldrarnir sæju nú yfirleitt um svona nafngift enda erum við með annað nafn í huga þó svo að María Rut sé mjög fallegt:)

Ég var líka að viðra það við hana hvort það gæti ekki verið að gaman að búa í útlöndum einhvern tímann og jújú hún var alveg til í það en sagði samt að þá þyrfti hún að giftast einhverjum enskum;) haha, róaðist samt strax aftur þegar ég sagði henni að hún gæti alveg gifts Eldi sínum. Hún spurði mig líka hvort að ég þyrfti að gifta mig aftur þegar ég eignaðist annað barn!

Vetrarrútínan er komin vel af stað og ég er svo mikið haustbarn að ég elska haustið og þegar byrjar að dimma og maður getur kveikt á kertum. Verður nóg að gera svo sem eins og alltaf en ég er samt ákveðin í því að vinna ekki lengur en til 9. des þó svo að ég verði ennþá alveg úberhress - taka skynsemina á þetta, maður er svo skynsamur alltaf hreint - right!

Við erum líka búin að hitta fæðingarlækni sem var klárlega waste of time en alveg efni í aðra færslu, aðalatriðið er þó að ég mun alltaf ráða hvað ég geri og því er stefnan sett á keisara milli jóla og nýárs - það er einhvern veginn meiri rómantík í kringum það heldur en 2. janúar sem er líka heldur nálægt settum tíma sem er jú þarna alveg í blábyrjun árs. Þetta kemur samt bara allt í ljós þegar nær dregur enda ekkert hægt að plana þegar kemur að þessum barnamálum - þau koma víst þegar þau eiga að koma eins mikil klisja og það er. Einhver góður maður líkti barneignum við gjafir - maður veit ekkert endilega hvenær maður fær gjöf og heldur ekkert hvernig hún verður - þannig er það nú bara.

Annars er bara mikil gleði á heimilinu yfir þessu öllu saman og álfurinn í maganum farinn að sparka duglega og láta finna fyrir sér. Ég er alveg súperhress og vona bara að það endist sem allra lengst:)

Har det brav....og nú mun þessi bloggsíða taka kipp fyrir alla þá sem búa úti og vilja fylgjast með gangi mála!

2011-08-18T20:49:00.002Z

Við tókum upp viðbrögð Áru við því að hún væri að fara að eignast litla systur, þau voru mjög svo einlæg og skemmtileg:)

Sjá hérna

Ég ætla síðan að setja smá kraft í þessa bloggsíðu með haustinu!

2011-06-18T11:25:00.002Z

Tókum 17. júní alla leið - með góðri byrjun á brunch með Álfi og Eldi, Brúðubíllinn, Ballið á bessastöðum ásamt öðrum atriðum, gasblaðra, snudda, andlitsmálning, 1 árs afmæli, grillveisla í Geislanum og punkturinn settur yfir i-ið þegar við rúntuðum í bæinn aftur að verða tíu um kvöldið og Ára fékk Candy flos og nammiúr:)

Við hýsum síðan eitt stykki ungling hérna á heimilinu - Svansý býr hjá okkur í nokkra daga og sefur í Buddha herberginu:) Það þarf ekki að hafa mikið fyrir þessum unglingum, leyfa þeim að sofa, þvo fötin þeirra og gefa þeim kvöldmat:) Ég tók síðan 17. júní vaktina og náði í hana í bæinn að verða eitt, alveg til fyrirmyndar hún Svava mín:)

Fullt af nýjum myndum á myndasíðunni undir maí/júní 2011!

Sæta 17. júní stelpan okkar

Flestir vita að AFO er búinn að vera á Paleo mataræði í rúma þrjá mánuði - hér má sjá hann ferskan í brunch:)

2011-06-15T21:11:00.003Z

Ég er ekki í lagi...

var að skoða gömul blogg frá mér og sé þá komment frá Selmu um að hún bíði svo bara eftir 29 ára afmælinu mínu og þá rifjast upp fyrir mér að ég hef tvisvar haldið "merkisafmæli" án þess að það sé merkisafmæli! Fyrst þegar ég var 19 ára á Hjallaveginum og síðan 24 ára afmæli á Kambsveginum, báðar veislurnar nokkuð stórar og mikil gleði og gaman. En um leið og ég las þetta komment frá Selmu fannst mér eins og ég hefði klikkað á 29 ára afmælinu og ég þurfti að taka mér alveg góðan tíma í að hugsa hvað ég væri eiginlega orðin gömul, greinilega gömul því það rann síðan upp fyrir mér að ég verð 29 ára í október á þessu ári - ég held það sé nú barasta ekki í lagi með mig! Fannst í augnablik að ég væri orðin 29 ára:)

En ég klikka ekki á partý-inu - lofa því:)

2011-06-10T11:00:00.002Z

Það hefur verið nefnt áður að Ára erfði textagenið frá mér, sælla minninga þegar hún söng "djobbelífs" (Don´t believe) með John Lennon:)

Í morgun var hún alveg megahress á leið leikskólanum - nýbúin að horfa á kirkjuþættina "Daginn í dag" sem eru vinsælir þessa dagna á "vodinu". Nema hvað að við heyrum hana syngja hástöfum: "Daginn í dag, daginn í dag gerði drottningin, gerði drottningin, gleðjast ég vil, gleðjast ég vil og vakna þennan dag og vakna þennan dag"

Greyið barnið þarf að lifa með þessu líkt og ég:)

Sumarfrí frá Laugalæk og skemmtileg vorferð í gær þar við Svavar frumsýndum starfsmannamyndband sem við erum búin að vera að grúska í ásamt nokkrum góðum aðstoðarmönnum og kom skemmtilega á óvart - set það kannski hérna inn við tækifæri.

Núna er Harpa í Exeter og verður í allt sumar, Svansý rokin til Spánar í fótboltaferð og mamma og pabbi á leið í Hólminn á mánudaginn, ég held að þetta hafi bara aldrei gerst áður að við séum svona öll á sitthvorum staðnum, verður örugglega mjög skrýtið!

Annars er ég mjög svo fegin að eiga Frakkland inni í júlí þar sem sumarið virðist ætla að koma ansi seint og um síðir hérna á Fróni en það kemur ég er viss um það.

Góðar stundir.

2011-06-06T23:10:00.002Z

2 ár liðin síðan þessi ógleymanlegi dagur átti sér stað, ótrúlegt hvað tíminn flýgur! Þetta þýðir bómullarbrúðkaupsafmæli og því var fagnað með góðum late night dinner á Horninu. Mér finnst reyndar að ég mætti kaupa mér eina bómullarflík líka:)

Annars get ég ekki hætt að hlæja að mismælum skólastjórans á útskrift 10. bekkjar fyrr í kvöld - ætlaði að segja "en þar ræður ríkjum" en mismælti sig og tók mestu mismæli allra tíma: "en þar ríður rækjum" - og þeir sem þekkja mig vita að ég ELSKA mismæli og það sem ég hló, maður minn, þurfti næstum að yfirgefa salinn!

Svansý formlega búin að ljúka Laugalæk og Laugó-mafían því einum liðsmanni færri. Hún stóð sig með glæsibrag og fékk himinháar einkunnir:)

Sóley snillingur fór létt með að unga út "litlum" 4 kg dreng en hann er yndislega fallegur og mikil værð yfir honum. Ég hugsa til þeirra svona ca. 10 sinnum á dag, mér finnst svo leiðinlegt að vera ekki nær þeim á þessum miklu tímamótum.

Sía mín búin að fá íbúðina sína á Laugarnesveginum og nú getum við farið að samnýta Bónusferðir og elda saman og rölta yfir í kvöldrauðvínsglas eftir erfiða vinnudaga:) Ég tók eldhúsið hennar í nefið í gær og kom skipulagi á hlutina - you know me, hata ekki að endurskipuleggja eldhús!

Annars eru þrír litlir vinnudagar eftir í Laugalæk og síðan tekur við smá danskennsla fram að Lu France sem verður geggjað - ég bara veit það.

*pís át*

2011-05-27T08:01:00.000Z

Lyf til að lifa?

Ára snillingur er búin að vera með einhvern ljótan hósta í vikunni en sagði sjálf í nótt að hún væri samt mjög hraust:) og hún má nú alveg eiga það því síðustu tvo vetur hefur hún verið stálhraust eftir að hafa tekið einn brjálaðan veikindavetur. Í nótt var hún samt alveg með hita og illt í eyrunum sínum líka, mér fannst þetta byrja um leið og loftið varð verra út af gosinu en maður veit svo sem ekki.

Í morgun þurfti ég að tala hana inn á það að vera heima því henni finnst svo ótrúlega gaman í leikskólanum að hún vill alls ekki missa dag úr og reyndi hvað hún gat til þess að fá að fara, það var ekki fyrr en ég sýndi henni útbrotin í andlitinu (sem ég hugsa að hafi komið út af áreynslu við að hósta) að hún sættist á það að vera heima með mér. Núna situr hún og horfir á Fíusól uppáhaldið sitt og fræðir mig um ýmislegt skemmtilegt. Rétt áðan sagði hún t.d að hún hefði einu sinni tekið meðal en svo hefði hún verið rosalega veik og þá hefði hún fengið lyf og svo bætti hún við: "En hvað er eiginlega lyf, er það til þess að lifa":) hahaha!

Vonandi nær hún sér í dag því á morgun er fótboltamót! Og hún og Brynja vinkona hennar ætla mæta galvaskar, ég á nú alveg að sjá þær keppa!

2011-05-21T08:47:00.005Z

Skammarlegt!

Ég er farin að skammast mín allsvakalega fyrir myndaleysi og bloggleysi og heiti því hér með að úr þessu verði bætt ekki seinna en strax í dag! Var að fara yfir myndatökur síðustu mánaða og eftir afmælið hjá Áru í mars voru ekki teknar nema 20 myndir sem er skammarlegt og í apríl að Blackpool undanskildu, 16 myndir! Ég henti þessu þó samviskusamlega inn á myndasíðuna ásamt Blackpool albúmi sem getur bara verið svo gaman að skoða:)

Af okkur fjöllunni er bara allt fínt að frétta, Andri að vísu handarbrotinn eftir glímuátök og búinn að vera í gipsi á þriðju viku og stefnir í 10 daga í viðbót ef ekki meira. Og þetta er á hægri svo hann þarf aðstoð við ýmislegt eins og gefur að skilja! En við hjálpumst að eins og okkur einum er lagið svo þetta bjargast ágætlega.

Heimasætan er sykusæt sem endranær og rúllaði 4 ára skoðun upp á dögunum. Rétt fyrir skoðun var ég að útskýra fyrir henni að hún þyrfti örugglega að telja og skoða myndir og segja litina og fleira og þá spurði hún mig þessi elska hvort hún ætti að telja á ensku eða íslensku:) Hún fór síðan í skoðunina og stóð sig sérlega vel að mati okkar foreldranna en á svona tímamótum má maður monta sig og vera ofurstoltur en hún tók sjónpróf eins og sex ára og þuldi alla stafina upp eins og ekkert væri, sýndi fram á góðan talnaskilning (annað væri nú fáránlegt;)) og var til fyrirmyndar í alla staði og þá er maður glaður, þannig er það nú bara. Og þá er mont ársins búið!

Einkadóttirin glæsileg á öskudaginn

Í sumar ætlum við síðan heldur betur að söðla um og munum eyða júlí-mánuði í Frakklandi nánar tiltekið í litlu þorpi sem heitir Férel og er á Brittany skaga. Ég bara veit að þetta verður geggjað, bara við þrjú familian í slökun og dekri í fallega Frakklandi og að sjálfsögðu er öllum velkomið að droppa við sem eru á ferðinni á meginlandinu. Við fljúgum til Parísar þann 7. júlí og komum tilbaka þann 28. júlí. Við verðum í húsi í eigu franskrar fjölskyldu en þau verða í okkar íbúð á meðan, ásamt því að skipta á bílum, algjör snilld og hagstætt í kreppuástandi. Þeir sem hafa áhuga geta kynnt sér málið hér

Eftir 9 daga á síðan Sóley elsta æskuvinkona mín von á sínu fyrsta barni, mér finnst svo leiðinlegt að vera ekki stödd í sama landi og hún en ég veit að hún leyfir mér að fylgjast með þessari miklu upplifun en ég er ekki í nokkrum vafa um að hún og Kobbi rúlla þessum nýju hlutverkum upp:)

Í dag er stefnan sett á fótboltaæfingu hjá Þrótti, það er heimasætan sem er að byrja að æfa ásamt vinkonum sínum. Hún vill endilega eignast fótboltaskó en við ætlum nú fyrst að sjá hvað hún endist margar æfingar!

2011-03-24T18:29:00.002Z

Langamma 98 ára!

Í dag fagnaði hún Ágústa langamma mín 98 árum. Ótrúlegur aldur og hún svo spræk að halda veislu fyrir fólkið á deildinni hennar ásamt okkur fjölskyldunni. Allir sungu afmælissönginn fyrir hana og hrópuðu húrra!

Mér fannst samt best þegar hún sagði að þetta væri nú engin veisla, hún væri bara að gera þetta að gamni sínu fyrir gamla fólkið! Hún er aldursforsetinn á deildinni:)

2011-03-22T17:40:00.001Z

Afmælis-Andri í dag!

Síðasta töttögu og eitthvað obbobbobb...

Hér í sumarfíling til að lyfta upp þessum endalausa vetri!

2011-03-06T20:23:00.002Z

4 ára Ára!

Litla kraftaverkastelpuskottið okkar er bara ekki svo lítil lengur:)

Nývöknuð og úfin að opna gjöfina frá okkur

Dúkkuhús sem var búið að óska sérstaklega eftir
Sofia Lára vinkona fékk að koma aftur í dag í fjölskylduafmælið en hún kom líka í gær í barnaafmæli þar sem 12 krakkar skemmtu sér konunglega og voru til fyrirmyndar, án gríns þá mátti heyra saumnál detta við matarborðið þau voru svo stillt án foreldra:)!

Fullt af myndum bíða þess að fara inn á myndasíðuna sem ég nenni þó ekki í kvöld en von bráðar!

Einnig bráðskemmtilegt myndband af öllum krökkunum að dansa hókí pókí og waka waka!

2011-02-15T19:18:00.005Z

Paraferðin part II - Winter Edition...

Brottför eftir þrjá daga, spenningur MIKILL!

Væri til í að eiga örlítið meira budget fyrir búðirnar en maður á Blackpool inni;)

Held að þessi ferð muni lyfta köldum vetri og dimmum dögum upp á hærra plan!

2011-02-06T21:46:00.002Z

Föstudagurinn 4. febrúar var tileinkaður degi stærðfræðinnar. Þemað í ár var stærðfræði og spil og því fengu nemendur mínir að spila ýmis "misskemmtileg" stærðfræðispil að þeirra mati:)

Mæli til dæmis með þessari síðu fyrir þá sem hafa gaman af Set Game, bara velja daily puzzle og þá hefst keppnin!

Í tilefni dagsins ætla ég að birta þraut sem ég sá hjá kollega mínum, vegleg verðlaun í boði fyrir þann sem verður fyrstur að leysa! Ég vil að sjálfsögðu fá að leið að svarinu meðfylgjandi.

Hvaða jákvæða heiltala N uppfyllir eftirfarandi fimm skilyrði:

1. N er slétt.
2. Þegar deilt er í N með 5 fæst afgangurinn 1.
3. N er margfeldi af 7.
4. N er minni en 1000.
5. Summa tölustafa N (þegar N er skrifað miðað við venjulegt tugakerfi) er 23.

Koma svo, kveikja á stærðfræðiheilanum!

2011-02-04T21:47:00.002Z

Barnabætur smarnabætur...

Við gerðum ansi vel við okkur í kvöld, nýttum 2000 kallinn minn sem ég fékk í barnabætur til þess að kaupa lambalundir í matinn - kannski verður pöntuð pizza fyrir Andra 2000 kall á morgun;)

En án gríns þetta er til skammar, 2200 kr. á mann! Þetta var nú lítið fyrir en við erum greinilega svona mikið hátekjufólk. Mér finnst lágmark að miða þetta eingöngu við dagvinnu eða 100% vinnu, ekki refsa fólki sem vinnur mikið.

2011-02-01T22:36:00.002Z

Reglubundið eftirlit hjá Leitarstöðinni...

Ég skellti mér í dag enda stuðningsmaður þess að fylgja þessu eftir á tveggja ára fresti. Þetta er aldrei það skemmtilegasta sem kona fer í en alltaf mikill léttir þegar þessu er aflokið. Eftir gott spjall og ýmis ráð frá henni Möggu marghugu minni í gær varð ég reynslunni ríkari en ég hef aldrei farið beint niður á Leitarstöð heldur alltaf til míns læknis. Hún benti mér til að mynda á að það væri einn læknir sem væri sérlega harðhentur og því skyldi ég annað hvort biðja um annan lækni eða panta annan tíma. Ég var því ekki lengi að athuga hverjir væru á vakt dagsins til þess að fullvissa mig um að þessi læknir væri ekki á vakt. Svo var ekki.

Galvösk gekk ég svo inn á minn bás en eins og Magga lýsti réttilega er þetta eins og vera í fjósi, færð þinn bás og slopp og situr svo ber að neðan meðal annarra kvenna í sama leiðangri. Ég fór úr sokkunum, fannst það passa betur við sloppinn á meðan margar aðrar voru í sínum, allaveganna, ég er kölluð inn og spurð hvort mér sé sama að læknanemi sé viðstaddur, jújú ég er til í það, þekkjandi nokkra læknanema og vitandi að þetta er þeim nauðsynlegt. Ég gerði mér samt ekki grein fyrir að læknanemar dagsins í dag eru ungir, ég er ung en þeir eru jafnvel enn yngri! Á móti mér tók því að mér fannst óttalega og jafnvel fullungur piltur sem ætlaði sér að vera viðstaddur þessa yndislegu athöfn. Og ekki varð það betra þegar læknirinn spurði hvort það væri í lagi mín vegna að unglambið fengi að taka sýnið undir hennar handleiðslu! Hvað getur maður sagt, ekki nei á þessu mómenti og sem betur fer þekkti ég ekki nemann! Þetta gekk samt vel hjá honum og hann alveg með þetta. Lærdómur dagsins framvegis er þó að afþakka læknanema nema fá að ganga úr skugga um að þekkja þá alls ekki. Mig langar ekkert sérstaklega að láta gamla nemendur mína vera að krukka eitthvað í kjallaranum mínum:)

2011-01-27T18:58:00.002Z

Merkilega hreinskilið

Á leiðinni úr vinnunni í dag hitti ég eldri konu sem ég kannast við hérna í hverfinu, hún spjallar alltaf aðeins við mig þegar við hittumst enda opin og nokkuð hreinskilin.

Spjallið í dag var á þessa leið:

Konan: Nei hæ!
Ég: Hæ!
Konan: Flottar gammósíur sem þú ert í eða eru þetta sokkabuxur?
Ég: Já svona leggings bara...
Konan: Ertu ekki fegin alltaf á vorin þegar kennslu lýkur?
Ég: Jú jú, ég hef samt mjög gaman að þessu starfi en auðvitað alltaf gott að fara í sumarfrí
Konan: Ertu að fá einhverjar bólur þarna? (Og bendir fyrir neðan munninn á mér)
Ég: (Nokkuð góð bara í húðinni þessa stundina) Uh..ég veit það ekki...
Konan: Ég fékk nú bólur alveg fram til sextugs...
Ég: Já, ég hef nú heyrt um einhverja svoleiðis
Konan: Já, já eða kannski er þetta bara þetta mánaðarlega...
Ég: haha já getur verið en við sjáumst!
Konan: Já við sjáumst!

Alveg merkilegt hvað fólk telur sig geta verið hreinskilið við mig:)

2011-01-18T17:14:00.002Z

Ertu kassi inni í kassanum?

Ég lenti í smá spjalli við einn nemanda minn um Stars Wars og ævintýramyndir og þætti yfir höfuð. Þetta byrjaði út frá því að ég sagði honum að ég væri ekki fyrir neitt ævintýra, hvorki bíómyndir, þætti eða annað slíkt. Hann vildi meina að maður yrði svo hugmyndaríkur með því að horfa á svona ævintýradótarí en ég þurfti í algjörri hreinskilni að segja honum að þetta hafi bara aldrei verið fyrir mig. Hann teiknaði þá svona kassa með fingrunum og spurði hvort ég væri bara inni í svona kassa, ég játti því og sagði honum að það kæmi alveg fyrir en þá bætti hann um betur teiknaði kassa inn í stóra kassann og spurði hvort ég væri kannski bara inni í kassa inni í kassa....!

Ég þarf að koma mér út úr þessum kassa stundum, það er alveg klárt mál. Ég get nefnilega hugsað út fyrir kassann en þarf að koma mér þaðan út hið snarasta!

2011-01-13T17:15:00.004Z

Utanlandsferðir, danskeppnir og fleira skemmtilegt framundan!

Þegar ég hugsa tilbaka þessi 11 ár sem við Andri höfum verið saman telst mér svo til að ég hafi farið til útlanda að minnsta kosti einu sinni hvert eitt og einasta ár! Ég man að vísu ekki alveg hvort ég fór eitthvað árið 2002 og því miður var ég ekki byrjuð að blogga þá og get því ekki flett slíkum heimildum upp en eflaust á ég einhverja dagbók frá árinu þar sem ég hef skráð þetta hjá mér! Þetta eru náttúrulega alveg fáránleg forréttindi í ljósi þess að stóran hluta af þessum tíma var ég námsmaður og hinn hlutann kennari. Ástæðan fyrir þessum ferðum er auðvitað að stærstum hluta tilkomin vegna allra þeirra aukavinna sem mér hefur boðist að taka og það er kannski stærsta ástæðan fyrir því að ég nenni því yfir höfuð, einungis í þeim tilgangi að komast að lágmarki einu sinni á ári út fyrir litlu eyjuna okkar.

Eftir hrunið hélt ég að nú yrði eitthvað lát á en síður en svo, strax nokkrum dögum eftir hrun áttum við bókað flug til Kaupmannahafnar með aðeins 2000 danskar í vasanum því meiri gjaldeyri var ekki að fá! Síðan var það Stokkhólmur og Ítalía 2009, árið 2010 hófst með ráðstefnunni BETT í London og paraferð um sumarið til Stokkhólms.

Og ég læt ekkert árið 2011 vera neinn eftirbáta hinna 11 á undan og eftir rúman mánuð er stefnan tekin á Paraferð part II Winter Edition þar sem við munum m.a. dvelja á þessu dásamlega Japanska Spa hóteli daglangt, sötra græn te, læra að gera sushi, fara í japönsk böð og iðka Zen hugleiðslu. Ótrúlega hvetjandi í annars drungalegum janúarmánuði að eiga þetta inni!

Í lok apríl tekur svo við önnur utanferð nánar tiltekið til Blackpool á danskeppni en dansskólinn fer að öllu líkindum með 9 pör á keppnina. Þetta verður langur tími frá fjölskyldunni á páskunum sjálfum en ég fer laugardaginn fyrir páska og kem ekkert aftur fyrr en laugardaginn 30. apríl! En stórskemmtilegt engu að síður og ótrúlega gaman að rifja skemmtilegar minningar síðan ég keppti sjálf í Blackpool á mínum yngri árum.

Nú þegar er verið að plana ömmu, systra og mæðgnaferð til Ameríku árið 2012 svo það lítur út fyrir að ekkert lát verði á þessum utanlandsferðum!

Það sem lítur hins vegar ekki vel út er fjárhagsáætlun Reykjavíkurborgar og alveg ljóst að staðan fyrir næsta skólaár verður mjög erfið og því ekki úr vegi að nota kannski síðustu tækifærin í bili til utanferða!

Um helgina verð ég stödd hér ásamt flottu danspörunum okkar:)

Í kvöld er það Ofviðrið með leikhúsvinunum okkar þeim Láru og Benna - hlakka til!

2011-01-08T14:43:00.002Z

Gleðilegt nýtt ár!

Við á Laugarnesveginum þökkum ykkur fyrir allt gamalt og gott og erum viss um það að 2011 verður gott ár:) Í ár verður enginn myndaannáll vegna þess að ég nenni því ekki og eitt af áramótaheitum 2011 er nefnilega leti og slökun, fækka excel skjölum og leggja sig þeim mun meira! Þið getið bara rúllað yfir myndirnar inni á myndasíðunni ef þið viljið rifja eitthvað upp:)

Við áttum dásamleg jól í faðmi vina og fjölskyldu og nutum þess að vera í fríi saman. Síðan er algjört janúarmöst hjá okkur að fá í það minnsta eina flensu og erum við mæðgurnar búnar að eyða síðast liðinni viku í slík skemmtilegheit - kvef, hósta og slen en ætlum að nota helgina til að hrista þetta af okkur.

Áran snéri sólarhringum alveg við í fríinu og var í ruglinu núna í vikunni þegar hún átti loks að mæta í leikskólann, vaknaði tvær nætur í röð um miðja nótt og vakti í þrjá tíma! Ekkert að henni, bara gat ekki sofið og var ekkert þreytt að eigin sögn. Frekar þreytandi fyrir foreldrana sem voru ekki að nenna þessu næturbrölti en gátu ekki annað en hlegið þegar hún spurði okkur hvort við vildum fimmu eða klesst´ann klukkan þrjú um nótt! Hressleikinn alveg í hámarki:)

Hún naut þess alveg að vera í fríi og slökun og sló svefnmet sitt á nýársdag þegar hún svaf til 13:00! Hún gat lesið á marga pakka og er farin að skrifa nöfnin á hennar nánasta fólki hjálparlaust enda dugleg að læra stafina, engin pressa samt þó ég viti að þið sjáið fyrir ykkur heræfingabúðir ala Linda:)

Inn á myndasíðunni má finna jóla og áramótamyndir, fimm ættliða myndir og nokkrar janúar myndir. Það er því algjör skylda að kvitta fyrir innlitið!

2010-12-21T09:41:00.001Z

Nýjar myndir í nóvember og desember albúmum á www.123.is/agustarut

Jólajóla á Laugarnesvegi...

2010-11-17T21:25:00.004Z

Nýir áfangar í lífi Áru litlu

Um helgina upplifði Ágústa Rut sína fyrstu alvöru sorg og sorgmædd var hún elsku litla kellingin. Þannig var mál með vexti að Lotta annar gullfiskanna okkar hefur verið heldur slöpp upp á síðkastið, hún hefur alla tíð verið sólgin í mat og kemur iðulega upp á yfirborðið þegar maður kemur að búrinu, líklegast hefur hún étið yfir sig eða fengið einhverjar meltingartruflanir en þessi dýr hafa víst enga þarma. Lotta var farin að synda á hvolfi og við töldum að sundmaginn hefði sprungið. Um helgina var Emil hinn fiskurinn farinn að synda ítrekað í kringum hana sem endaði með því að hann hékk alveg utan í henni en þá tók ég eftir því að hún var alveg farin frá okkur. Ég ákvað að taka hana strax upp úr búrinu og setti í lítinn poka því ég vildi ekki að Ára sæi hana liggja þarna. Síðan kom stóra spurningin, hvernig átti ég að tilkynna barninu um þetta fráfall og útskýra hvers vegna Lotta væri ekki hjá okkur lengur. Eftir smá umhugsunartíma ákvað ég bara að taka þetta alla leið, segja henni eins og var og sýna henni Lottu. Í fyrstu hugsaði ég með mér hvaða endemis vitleysa þetta hefði verið í mér, barnið gjörsamlega brotnaði saman og var með ekka yfir þessu öllu saman og gat ekki skilið af hverju Lotta væri dáin en samt með opin augu og spurningar eins og hvert hún færi og af hverju hún hefði verið veik voru erfiðar tilsvara. Ég reyndi að útskýra að hún myndi fara til afa Egga en hún hefur talað um að hann sé dáinn en þá kom auðvitað sú pæling að Lotta kæmist ekkert til hans og hún óskaði sérstaklega eftir því að við færum aftur með hana í búðina, ég hafði alltaf heyrt að maður sturtaði þeim bara í klósettið en AFO stakk upp á því að grafa hana í jörðu og kveikja á reykelsi! Þetta endaði nú samt sem áður allt saman vel og barnið sættist á það að kaupa nýjan vinafisk fyrir Emil svo hann yrði nú ekki einmana og hefur sá fiskur fengið nafnið Björgvin Frans:)

...sem var síðan skemmtilegt í ljósi þess að við fórum á bókakynningu á sunnudeginum á nýrri bók eftir sjálfan Björgvin Frans og Gunna Helga þar sem Ágústa Rut fékk að tala við og fá eiginhandaáritun hjá sjálfu goðinu, hún gat líka sagt honum að hún ætti fisk sem héti Björgvin og það vakti mikla lukku. Ekki skemmdi síðan fyrir mynd af henni í Mogganum í dag þar sem hún fylgist dolfallin með þeim leiklesa upp úr bókinni.

Og enn hellast áföllin yfir litla þriggja og hálfs árs stúlku en í gær var hún svo skelfilega óheppin að detta virkilega illa á steina á leikskólanum og lítur nú út eins og atvinnuboxari sem sjá má á myndum hér fyrir neðan. Hún var ótrúlega brött og kláraði bara daginn á leikskólanum og kældi bólguna samviskusamlega sem er núna byrjuð að leka skemmtilega yfir allt augað og mynda hina ýmsu liti. Við þökkum fyrir að ekki fór verr en hún hefði hæglega getað nefbrotnað, rotast, misst tennur og þar fram eftir götunum svo fall er fararheill eins og það stendur. Hún vaknaði hins vegar upp í nótt og þurfti að tala stanslaust um slysið í tæpar tvær klukkustundir við okkur og lýsa nákvæmlega aðdraganda þess og eftirmála:) En við erum fegin að hún fór yfir þessi mál enda sjálfsagt mikið sjokk að lenda í þessu og sjá sig í spegli svona útlítandi.

Í dag átti að pakka henni í bómull í leikskólanum og leyfa henni að vera smá súkkulaði í ljósi aðstæðna gærdagsins. Hún hélt nú ekki, að vera inni var ekki möguleiki hjá henni, hún ætlaði sko út en bara ekki í steinana í þetta skiptið:) Hún er hörkutól eins og mamma sín;) Og guði sé lof fyrir það að við erum búin að fara í jólamyndatökuna!

Í kvöld eyddum við síðan dágóðum tíma í skólaleik en barnið þekkir orðið nánast hvern einasta bókstaf og veit hverjir eiga hvaða staf. Þetta er algjörlega sjálfsprottið þrátt fyrir að flestir viti um æfingabúðirnar sem ég er alltaf með í gangi hverju sinni! En að öllu gamni slepptu þá finnst mér ekkert að því að virkja þennan áhuga ef hann er til staðar. Hún kallar mig kennara og biður mig að gera stafi á krítartöfluna, búa til dæmi og segja sögur. Allar dúkkurnar eru líka þátttakendur í þessu og hún lætur mig iðulega vita ef einhver er ekki að gera eins og á að gera! Áðan skrifaði hún t.d Rut og Harpa eftir minni forskrift og skráði dæmið 1+1= 2 í "skólabókina" sína. Spurði mig síðan hvort það væri ekki hvíld í skóla og bað um mandarínur:) Mér finnst þetta auðvitað alveg magnað enda veit ég ekkert skemmtilegra en að vera í skólaleik allan daginn! Þannig að núna veit hún alveg hvað hún þarf að gera til að fá mömmu sína til að leika.

En jæja þetta er ágætis skrásetning á afrekum heimasætunnar og sólargeislans á Laugarnesveginum. Hinir tveir meðlimirnar eru líka bara kátir. AFO dottinn í eitthvað Wheetos cravings og úðar í sig hverri skálinni á fætur annarri eins og hann sé orðinn 18 ára á ný. Ég var með 20 foreldraviðtöl í dag eftir þriggja tíma svefn og sé í hyllingum bústaðaferðina með Lokastígsgenginu um helgina þar sem lestur góðra bóka, svefn, vellystir í mat og drykk en umfram allt mun skemmtun í góðra vini hópi vera allsráðandi.

Fyrsta kvöld boxarans - bólgan byrjuð að koma fram
Annað kvöldið - ýmsir litir farnir að gera vart við sig

Þetta var "allt" of sumt gott fólk:)

2010-11-09T21:16:00.002Z

Litli sushi snillinn!

19. febrúar 2010 - þarf enn aðstoð pabba síns við að koma bita í munn

7. nóvember 2010 - mundar prjónana eins og hún hafi aldrei gert neitt annað!

Gott að hún þarf ekki að éta allt ofan í sig líkt og foreldrar hennar hvað varðar sushi át:)

2010-11-08T18:39:00.003Z

Þá er ég loksins búin að hlaða inn októbermyndum og nokkrum nóvember:)

Þetta tekur sinn tíma þegar er mikið að gera og myndainnsetning einhvern veginn ekki það fyrsta sem maður hugsar um þegar kemur loks breik!

En október er búinn að vera skemmtilegur - afmæli húsfreyjunnar, afmæli Elds, afmæli Don Ruth, brunch hér og þar og mikill dans og mikil vinna:)

Nóvember byrjar vel með tveimur frábærum tónleikum, GRM á fimmtudaginn voru frábærir og Palli og sinfó þeir allra allra bestu sem ég hef farið á, hvaðan fær maðurinn alla þessa orku og jákvæðni! Síðan tókum við Álfur á móti jólabjórnum á föstudagskvöldið ásamt Hjalla, Búgga, Nínu og Loga og skemmtum okkur konunglega:) Vorum með rosaplön um vatnsglös á milli og síðasta strætó heim um miðnætti - það datt einhvern veginn allt upp fyrir!

Núna er svona mesta álagið í dansinum búið fyrir jól, einhverjar sýningar eftir en alls ekki eins mikið og er búið að vera.

Framundan er kósý bústaðaferð og jólahlaðborð með öllu tilheyrandi og hér á bæ er komin þvílík tilhlökkun fyrir jólunum og ekki seinna vænna en að fara að henda gjöfunum upp í Excel og ákveða smákökusortir og jólakortamyndir.

2010-10-25T23:10:00.003Z

Einn dyggasti aðdáandi þessarar forlátu bloggsíðu, eiginmaðurinn sjálfur, kvartaði sáran undan þessu bloggleysi, honum finnst greinilega gaman að lesa fréttir af okkar innihaldsmikla lífi!

Á þessum tæpa mánuði sem hefur liðið milli blogga hafa nýjar atvinnuhugmyndir litið dagsins ljós hjá minnstu konunni, hún ætlar nefnilega að verða leikskólakennari - ekki dóttir foreldra sinna fyrir ekki neitt;) Hún ætlar að vinna á Laugaborg, fer auðvitað ekki úr LA.

Hún er líka búin að prófa ýmislegt og tók þá sjálfstæðu ákvörðun að hætta bara í dansi í bili, þetta var ekkert fyrir hana að vera að dansa við aðra að hennar sögn. Hún ætlaði nefnilega að byrja í fótbolta og að sjálfsögðu tókum við bara vel í það og ég bókaði hana á æfingu með 8. flokki Þróttar. Einn laugardagsmorguninn mættum við mægður síðan á æfingu hjá Þrótti en þarna áttu að vera samankomin börn á aldrinum 2005-2007 en vildi ekki betur til en svo að þær voru þrjár stúlkurnar ásamt 23 drengjum:) Áran okkar og Anna Karólína vinkona hennar og síðan ein önnur stelpa sem gafst fljótlega upp á þessu. Þær voru sem sagt tvær vinkonurnar með mörgum 5 ára drengjum og ég sem er nú ekkert sérlega viðkvæm fékk nú alveg sting í hjartað þegar vestum í þremur mismunandi litum var hent í þau og nú átti sko að spila fótbolta og þær vinkonurnar í rauða liðinu, þær léku aðeins með en gáfust fljótt upp því miður. Hins vegar fundu þær sig vel í boðhlaupi sem þriðja liðið fékk að vera í og æfingum með boltann og sprettum o.s.frv. Ára klára kláraði æfinguna með stæl og ég tók ansi skemmtilega mynd af henni í strákahafinu í "stórt skip, lítið skip" í lokin. Hún sagði mér samt á leiðinni heim að hún ætlaði ekkert að fara aftur þarna á fótboltaæfingu, nú myndi hún bara fara í ballet og fimleika:) Og mikið skil ég hana vel og vildi óska þess að það væri til fótbolti sem er bara fyrir stelpur á þessum aldri.

Þessa dagana er ákaflega vinsælt að teikna og hún er farin að teikna okkur öll með haus og fætur og hendur út frá honum, mjög svo skemmtilegar myndir og gaman að fylgjast með þróuninni í þessu en hún lærir örugglega mjög mikið af 4 ára krökkunum á deildinni. Síðan finnst henni líka alveg frábært að perla og gerir ótrúlega flott mynstur að mínu mati en hverjum finnst nú sinn fugl fagur eins og það stendur.

Í dag fór hún síðan í fyrsta skipti til tannlæknis, ég hafði heyrt gott orð af Heiðdísi nokkurri í Turninum í Kópavogi og hún var frábær, gerði tannlæknaheimsóknina að einhvers konar ævintýraferð sem gerði það að verkum að Ára vildi ekkert fara heim og fékk fínan hring í verðlaun.

Önnur læknaheimsókn á morgun út af grun um blöðrubólgu hjá dömunni sem er þó búið að kanna í þremur þvagprufum og einni blóðprufu en það er saga í annað blogg þegar hún var stungin milljón sinnum af mjög svo ófaglegum meinatækni svo ekki sé meira sagt. Meira um það síðar...

Við hjónin höfum síðan verið að halda ansi mörgum boltum á lofti það sem af er hausti en stefnum á rólegan desember, er það ekki bara málið að hella sér inn í aðventuna alveg bara í 1. gír - það held ég nú! En svona er þetta nú bara stundum, maður hellir sér út í allskyns hluti sem voru einhvern veginn ekki á teikniborðinu en virðast teikna sig þar sjálfir:)

Vetrarleyfið senn á enda sem og rauðvínsbeljan sem við Álfur byrjuðum á síðastliðið fimmtudagskvöld. Ég lofa síðan myndum fljótlega - þarf klárlega að bæta úr myndaleysi september mánaðar.

Aðíós.

2010-09-27T14:51:00.002Z

Dóttir mín hefur lengi vel haldið því fram að hún ætli að verða hárgreiðslukona þegar hún verður stór. Síðustu daga hefur hún hins vegar verið að breyta um skoðun, núna ætlar hún nefnilega að verða búðarkona. Ég spurði hana auðvitað hvað hún ætlaði að selja í búðinni sinni og svarið var einfalt: "mat!" og í kjölfarið kom: "Ég ætla að vinna í Bónus" og síðan bætti hún við að auðvitað þyrftum við samt að keyra hana þangað út af því að hún vissi ekkert hvar Bónus væri:)

Við munum auðvitað styðja hana í öllu sem hún tekur sér fyrir hendur!

2010-09-22T21:38:00.002Z

Ég lenti í hressandi atviki í kennslu nú á dögunum og er ekki frá því að þetta hafi verið eitt það vandræðalegasta á mínum ferli. Svo vandræðalegt að ég mun ekki rita það á netið en hef gaman að því segja frá munnlega. Þetta kennir manni eitt, ferðir á bókamarkað geta leikið mann grátt:)

Það rann upp fyrir mér að ég á afmæli eftir litlar tvær vikur - fáir gleyma þessum degi, 6. október enda dagurinn sem Guð þurfti að blessa Ísland.

28 ára - maður er ekkert að yngjast, það er nokkuð ljóst!

2010-09-18T19:01:00.003Z

Föstudagstrítment...og laugardagseyðsla!

Sushi - lit og plokk - heilun - aukatími í stærðfræði - æfing hjá keppnishópnum í Ártúnsskóla! Kom síðan heim og þá var "ráðskonan" okkar búin að taka heimilið í gegn - já þið lásuð rétt við erum komin með "ráðskonu" til að taka alþrif tvisvar í mánuði svo við getum farið beint inn í helgina í frí án þess að eyða helmingnum í tiltekt og ég er yfir mig ánægð eftir þessa ákvörðun okkar:)

heimsætastan byrjaði síðan í samkvæmisdansinum í dag með 4-5 ára, stóð sig eins og hetja þó mamma hennar þyrfti að vera að kenna í tímanum, rosa margir krakkar hjá okkur eða um 25 stykki! Sem er auðvitað frábært. Ég kenndi síðan þremur hópum og það gekk vel, duglegir að dansa þessir ungu krakkar og 5-7 voru heimsins mestu dúllur í waltz og cha cha cha:)

Fórum síðan með Álfrúnu, Agli og Eldi á sushi lestina til að leyfa börnunum að gæða sér á gúrkubitum en þau elska sushi þessi litlu krútt:) Eldur að vísu heldur æstur í wasabi og þurfti næstum að hringja á 112 en það bjargaðist fyrir horn;)

Dóttirin búin að eignast nýtt par af Ecco skóm, svarta með glimmeri og dressuð upp af Janus fyrir veturinn - alveg hreint nauðsynlegt fyrir litlu lungun í þessum kulda.

Núna er bóndinn og litla konan að elda kjötsúpu, frúin er búin að opna rautt og framundan er kósýföstudagskvöld og kærkominn frídagur á morgun.

2010-09-16T21:31:00.003Z

Góðar minningar...

Mér þykir alveg óendanlega vænt um þetta blogg mitt og skemmti mér oft konunglega við það eitt að lesa gamlar færslur, komment og rifja upp gamlar minningar. Stundum fæ ég alveg fáránlega mikinn kjánahroll og stundum skellihlæ ég. Það sem er samt einhvern veginn alltaf best er að ég er eiginlega aldrei að skrifa um neitt sem skiptir einhverju rosalegu máli, sjaldan að taka reiðiköst út í eitthvað, gagnrýna, pirrast eða koma með einhverja málefnalega punkta. Það skiptir líka engu máli því þegar upp er staðið eru þetta ómetanlegar minningar síðustu sjö ára sem ylja mér um hjartarætur.

...það sem mér finnst líka svo frábært er að þegar ég skoða t.d. september 2004 þá sé ég að ég hef bara ekkert breyst neitt svakalega mikið, er bara enn alveg að horfa á sex and the city, taka hlátursköst með Álfrúnu og partýprumpa:) Það er góðs viti held ég.

2010-09-15T19:07:00.002Z

Halló halló...

í kollinum á mér leynist sjálfsagt heill haugur af bloggfærslum og heldur betur lélegt af mér að hafa ekki skrifað boffs hérna í alltof langan tíma!

Eftir sumarfrí var ekki laust við að við LA-búar hlökkuðum bara til haustsins og skammdegisins sem fylgir því í kjölfarið. Sumrin eru auðvitað alltaf æðisleg og forréttindi að fá gott og endalaust skemmtilegt sumarfrí eins og myndir myndasíðunnar gefa til kynna. En síðan verður maður bara pínu þreyttur á því að vera á stöðugu flakki, endalausum boðum, hittingum, afmælum, skírnum, brúðkaupum og þar fram eftir götunum, allar helgar smekkfullar. Ekki misskilja mig, þetta er ÆÐI! En svo er bara svo gott að eiga líka svona helgar þar sem maður er bara heima með fullt af kertum að kúrast uppi í sófa og gera akkúrat ekki neitt:)

Það er nú samt sem áður sjaldan þannig hjá mér, því ég er auðvitað snillingur í að taka að mér allskyns verkefni af öllum stærðum og gerðum. Veturinn fer vel af stað í Lauglæk og ég vil meina að ég sé í skemmtilegasta og mest gefandi starfi sem um getur, tekur stundum á en með mínum frábæru vinnufélögum verður þetta leikur einn. Andri heldur áfram að "verkefnasstjórast" á frístundaheimilinu en samhliða því er hann líka í kennsluréttindanámi í HÍ og auðvitað í Zen-inu og Jiu Jitsu. Hann verður síðan í vettvangsnámi í Laugalæk einn dag í viku þannig að við verðum samstarfsmenn:) Litlu krúttlegu kennarahjónin!

Ég er síðan orðinn formlegur meðeigandi í dansskólanum og verð með þrjá hópa í vetur og einu sinni í viku á æfingum með keppniskrakkana, ég veit dáldið mikið auka fyrir utan vinnuna en svo gat ég ekki sleppt því að vera með þrek einu sinni í viku í Skylmingafélaginu og tek líka einn menntaskólastrák heim í stærðfræðiaðstoð. Þetta hljómar kannski frekar yfirþyrmandi og krafðist þess alveg að ég myndi búa til sér stundatöflu fyrir allt sem við AFO gerum fyrir utan eðlilegan vinnutíma:) En ég er svona tarnakelling, mér finnst gaman að taka góða vinnutörn í 3 mánuði og tríta mig svo vel að því loknu, þannig er það nú bara. Við Álfur vorum síðan alveg hrikalega duglegar í bjöllunum í sumar og búum vel að því í vetur og ætlum að halda áfram að æfa þar, ég kemst því miður aðeins sjaldnar en ég vildi en Álfurinn er á útopnu og náði 313 endurtekningum í Fight Gone Bad nú á dögunum með réttum þyngdum - þeir skilja sem skilja:) Snillingur hún Álfrún.

Síðast en ekki síst er heimasætan hún Ágústa Rut orðin alveg svakalega fullorðinsleg. Hún tók stórt skref um miðjan ágúst þegar hún hoppaði yfir eina deild á leikskólanum ásamt þremur vinkonum sínum og er núna á Fagralæk með 2006 fæddum börnum. Og að sjálfsögðu nýttum við tækifærið og stungum upp á því að hætta með duddu um leið og hún myndi byrja á stóru deildinni og það samþykkti hún en með því skilyrði að Alma Júlía fengi að eiga duddurnar hennar þrjár sem eftir voru. Þann örlagaríka morgun 16. ágúst setti hún síðan duddurnar í box og Andri tók með sér í vinnuna til að afhenda Hjalta. Ég bjóst við einhverju hrikalegu enda búin að heyra sögur af börnum sem voru að vakna á nóttinni og vaka í fleiri fleiri tíma. Þótt ótrúlegt sé og miðað við duddusjúklinginn sem hún var þá var þetta EKKERT mál, grét í svona ca. tíu mínútur þegar hún kom úr leikskólanum og áttaði sig á því að þetta væri orðið að veruleika en svo bara ekki söguna meir, sofnaði bara um kvöldið og hefur ekki stungið snuði upp í sig síðan! Ég var nú bara dáldið stolt af henni að standa sig svona vel í þessu. Hún er síðan að fara að byrja í 4-5 ára hópnum í dansskólanum á laugardaginn og ég krossa putta að henni eigi eftir að finnast þetta jafngaman og móður hennar fannst. Ég er meira að segja búin að fá ekta dansskó fyrir hana í stærð 25!

Hún stjórnar líka hægri vinstri á heimilinu og lætur sko ekki segja sér hvað sem er. Ég fæ t.d. oft að heyra það að hún segi pabba ef ég er að skamma hana og einnig að ég eigi að segja fyrirgefðu og nennir alveg að þræta um það endalaust að við eigum að segja fyrirgefðu við hana:) Hún elskar líka að knúsa okkur og segja "mamma er best" og "pabbi er bestur" en stundum heyrist líka "pabbi er bara vinur minn":)

Ég held ég segi þetta bara gott í bili, lofa sjálfri mér hér með að skrifa meira inn á þessa annars ágætu síðu sem ég hef haldið til haga nú á sjöunda ár!

Aðíós Róbó Linda

2010-09-03T20:52:00.002Z

Ég trúi ekki að skyndilindan hafi ekkert skrifað í rúman mánuð, hún hlýtur að fara að taka sér tak!

Mun til að byrja með setja inn myndir á myndasíðuna!

2010-07-27T01:53:00.002Z

Loksins er ég búin að setja inn á annað hundrað myndir úr paraferðinni góðu og munið að þarna eru bara tvö pör á ferð í allskyns sprelli og skemmtun og þess vegna eru bara myndir af þeim...eða svo gott sem:) Njótið vel...

Ég er síðan með annan eins skammt úr yndislegu sumarfríi okkar sem hefur verið dásamlegt það sem af er - bústaðaferð með góðum vinum og frábær skemmtun á Mærudögum á Húsavík þar sem við dvöldum í góðu yfirlæti í heimahúsi með fulla þjónustu, skoðuðum Hvali og kíktum í Ásbyrgi svo eitthvað sé nefnt:)

Klofi Tómasar frænda rétt handan við hornið og alltaf tilhlökkun fyrir þessa hátíð sem enginn veit þó hvernig verður hverju sinni!

2010-07-06T23:58:00.003Z

Ef við erum ekki að gæsa eða steggja, í brúðkaupi, nafnaveislu eða skírn nú eða barnaafmæli þá telst það til undantekninga!

Magnús Þór Bjarnason fékk sitt fallega nafn eftir frábæra ræðu föður hans um aðdraganda fæðingu hans, nafnagift, getnað og fleira og þar var ekkert slegið af:)

Glæsilega "I´m blue dabadedadabadabadeeda Laufás Family" með þeim allra nýjasta Gunnari Andra Benediktssyni - Andri Fannar hélt því fram að skírnir hjá Láru væru þær allra skemmtilegustu en þar fær hann ávallt nafna;) Fyrir tæpum fjórum árum var það hann Bjarki Fannar og eigum við eitthvað að ræða hvað mér finnst fáránlega stutt síðan!

Mæðgur mjög svo glaðar að vera komnar í bústað í Öndverðarnesinu

Blómarósin bezta sem elskar sumarfríið sitt - sagði í bílnum á leiðinni í bústaðinn þegar við spurðum hvort hún væri ekki glöð að vera í sumarfríi: "Jú enginn að ýta mér, enginn að pota í mig, enginn að lemja mig, enginn að stríða mér!" Það tekur greinilega á að vera þriggja ára í leikskóla:)

Stokkhólmur handan við hornið og veðurspáin ljómandi!

2010-07-03T00:04:00.002Z

Ég smellti inn restinni af júní myndum á www.123.is/agustarut, þetta eru m.a. myndir úr gæsunum, Árbæjarsafni og fleiru

Set hérna fyrir neðan tvær af bestu minni að baka hafraklatta fyrir síðasta daginn sinn í leikskólanum en frá og með deginum í dag er hún komin í fimm vikna sumarfrí líkt og karl faðir hennar - ekki leiðinlegt það skal ég segja ykkur:)

Ég er líka komin í mínar sex sem eftir eru...bara svona hafa það á hreinu!

Einbeitingin leynir sér ekki - við að sleikja kremið sem sagt!

Dáldið mikið sport að baka fyrir alla yndislegu kennarana á leikskólanum!

2010-06-30T09:38:00.003Z

"Epilator ævintýrið"

Hún Sóley vinkona hefur aldrei verið þekkt fyrir annað en að vera með ráð undir rifi hverju og ósjaldan bent mér á ýmislegt skynsamlegt. Nú síðast var það þessi græja - epilator eða hártætari! En þegar konur hyggja á viku para/treatment ferð til Stokkhólms er nauðsynlegt að vera með vel "skafaða" leggi.

Manneskja sem hefur aldrei gerst svo stórtæk að leggja það á sig að fara í vax ætlar sér þó heldur mikið um of þegar hún fær lánaða slíka græju og byrjar að tæta - DJÖFULL ER ÞETTA VONT! Ég var rétt komin langleiðina með hægri þegar ég játaði mig sigraða, hringdi í Sóleyju og spurði hvort þetta ætti í alvörunni að vera svona sjúklega vont, Sóley greyið hafði þá ekki alveg gert sér grein fyrir hversu mikill amatör ég væri í þessum málum og benti mér á að það væri kannski gott að láta klára þetta mál með vaxi og taka svo næsta skipti með græjunni. Og sú var lendingin, ég sendi snyrtikonunni minni örvæntingarfullt sms klukkan tíu í gærkvöldi og spurði vinsamlega hvort hún gæti vaxað á mér vinstri legginn og útskýrði vandmálið fyrir henni. Fékk tilbaka hahahaha já Linda beauty is pain! og á núna tíma kl 11:30 til að klára þetta. Ég mun hins vegar ekki gefast upp á hinu og ætla fjárfesta í helv... tækinu, ég sé nefnilega hversu fínt þetta verður og alveg sársaukans virði:)

Andri spurði einmitt í gærkvöldi hvort þetta yrði ekki eins með þessa græju og álfabikarinn sem títtnefnd Sóley benti mér líka á fyrir rúmu ári síðan. Fyrst þegar ég heyrði um þennan bikar sem ætti að troða upp í leggöngin varð mér allri lokið og fullyrti að þetta væri sko ekki fyrir mig. Nú rúmu ári seinna hef ég étið það allt ofan í mig og ELSKA bikarinn minn og gæti aldrei í lífinu án hans verið og hika ekki við að dásama hann mánaðarlega:)

Ég spái sama árangri með hártætarann!

...to be continued

2010-06-28T09:05:00.002Z

Blæs ekki út nös...right!

Þarna eru ca. 9 búnir og vá hvað sá síðasti tók á...

Frábær helgi að baki, Elín Anna var gæsuð á laugardaginn og var standandi prógram frá 7 um morguninn og fram á kvöld en ég svissaði yfir í þrítugsafmæli Fíu og Stínu eftir að hafa endurræst mig í Laugum Spa og við tók stanslaust stuð til að vera fimm um nóttina - þá sjaldan sem maður lyftir sér upp. Hressleikinn var samt bara þó nokkur í gær en alveg ljómandi fínt að vera í sumarfríi og get tekið svona eins og eina kríu hér og þar:)

9 dagar í "Stokkhólms-trítmentið" og niðurtalning formlega hafin

2010-06-24T13:22:00.003Z

Miðnæturhlaup á Jónsmessu

Flottur hópur úr fjölskyldunni skellti sér í hlaupið og árangurinn ekkert af verri endanum. Bjarki frændi á 52:52 sem er helvíti gott fyrir mann á hans aldri:) Ekki mitt persónulega besta en 48:56 var tíminn samkvæmt klukkunni en ég geri ráð fyrir að flagan gefi mér 5-10 sek betri tíma. Fyrri hringurinn gekk mjög vel og ég var í góðum gír, sá seinni var heldur erfiðari og eiginlega bara óbærilegur á tímabili en svona vill það verða þegar maður hleypur ekki nógu oft en bjöllurnar hafa algjörlega verið í forgangi undanfarið. Markmiðið var samt bara að ná undir 50 en nú fer markmiðið að verða að ná undir 48.

Þegar ég skoða gömul úrslit úr þessu hlaupi en ég var ansi virk árin ´96, ´97 og ´98, þá átti ég best 47:08 en þetta er á aldrinum 14-16 ára og kannski ekki alveg sambærilegt en ágætis viðmið. Núna VERÐ ég bara að æfa markvisst og komast einhvern tímann undir 45, það væri draumur:)

Takk fyrir skemmtilegt hlaup, mamma, Svava, Bjarki og Jóel!

2010-06-22T22:21:00.004Z

Ára litla sushibarn

Þessi mynd var tekin í febrúar síðast liðnum en þá byrjuðum við að venja heimasætuna á sushi át svo hún þyrfti ekki að éta ofan í sig allt slæmt umtal um sushi líkt og við foreldrarnir þurftum að gera á sínum tíma. Núna fjórum mánuðum síðar elskar hún að fara á Sushi lestina eins og hún kallar hana sjálf og um helgina fór hún með pabba sínum og borðaði hvorki meira né minn en 9 bita! Tók samt skýrt fram að henni þættu gúrkubitarnir bara góðir:)

Dásamlegt þetta barn það verður ekki af henni tekið ef við horfum á þetta hlutlausum augum!

Þessa dagana þýðir ekkert annað en að vera í kjól eða pilsi og í morgun gekk hún meira að segja svo langt að fara í kjól og pilsi í leikskólann! Núna er líka mjög vinsælt að segja okkur að "mamma sé best" eða "pabbi sé bestur" og núna rétt fyrir svefninn tók hún utan um okkur og sagði: "mamma er best, pabbi er bestur og ég er best, við öll þrjú erum best" Krúttleg með meiru...

Sumarfríið rúllar vel af stað hvað varðar bjölluæfingar, hlaup og hádegishittinga en það fer eitthvað minna fyrir tiltekt og öðru sem átti að framkvæma en þetta er nú bara rétt að byrja þannig ég hef engar áhyggjur af því að ég verði ekki búin að litaraða í fataskápinn og flokka í eldhússkápana að fríi loknu.

Þessa vikuna og næstu verð ég að kenna uppi í dansskóla milli 16-20 á daginn, ekki besti vinnutíminn í heimi þegar maður er með barn en gengur upp þegar pabbinn er kominn heim. Reyndar erum við með megapúsluspil til að allt gangi upp og í dag hjólaði AFO í vinnuna á hjólinu með barnastólnum, ég náði í Áru rúmlega þrjú og skutlaði henni vestur í bæ til pabba síns svo hún gæti klárað vinnudaginn með honum og þau síðan hjólað saman heim og ég farið á bílnum upp á Bíldshöfða - gott plan og virkaði vel þannig ég geri ráð fyrir að það verði notað aftur:)

Lofa nýjum myndum af ferð okkar á Árbæjarsafnið um helgina - eyddum ekki nema tæpum þremur tímum þar!

2010-06-17T23:04:00.002Z

Nýjar myndir í lok maí og júní albúmi - www.123.is/agustarut

Eurovisonkvöld

Ævintýraskógurinn

Brúðkaup

Sushi og hvítvín

17. júní

It´s sommertime....

2010-06-17T00:57:00.003Z

Ára hefur erft eitt gott gen frá mér...

hið víðfræga textagen:) Við Andri skildum hvorki upp né niður um daginn þegar hún bað um "djobbelífs" og spurðum endalausra spurninga um hvað þetta væri nú eiginlega eða þar til dóttir okkar var við það að fara að væla. Þá áttaði Andri sig skyndilega á því að hún væri að biðja um lagið God þar sem John Lennon syngur I don´t believe í viðlaginu! Hún er með góðan tónlistarsmekk stúlkan en greyið situr uppi með textagenið - ég meina hver man ekki eftir hommideis?

Annars sá ég það í dag að ég læt stundum alltof mikið eftir henni, þurftum að þeysast í gegnum Bónus og áður en ég vissi af var þessi meters manneskja búin að "láta" mig kaupa kleinur, kók, Sollu ís og tvo hlauporma í poka. Ég þarf klárlega að taka mig aðeins á í uppeldinu:)

Í fyrra fékk hún Spiderman blöðru á 17. júní, núna segist hún vilja Latabæjarblöðru - ekki alveg nógu góð þróun en sjáumst til hvernig þetta endar:)

Að lokum - hamingjuóskir til Örnu og Bjarna sem eignuðust son í nótt og við á Laugarnesveginum hlökkum mikið til að sjá þennan litla mann sem er án efa dásamlegur líkt og foreldrarnir.

2010-06-10T20:33:00.003Z

Íslensku menntaverðlaunin

Á þriðjudaginn síðast liðinn hlaut ég þann heiður að fá Íslensku menntaverðlaunin í flokki ungra kennara sem hafa sýnt hæfileika og lagt alúð við störf sín.

Að mínu mati er það einstakur heiður að hljóta þessi verðlaun og jákvætt þegar tekið er eftir störfum kennara ásamt því að vera mikil hvatning í áframhaldandi starfi.

Slíka viðurkenningu hlýtur þó enginn upp á eigin spýtur. Ég var ákaflega heppin þegar ég fékk kennarastöðu við Laugalækjarskóla fyrir 4 árum síðan, yndislega samstarfsfólkið mitt þar hefur gert mér kleift að viða að mér ómetanlegri þekkingu og reynslu úr þeirra brunni svo ég tali nú ekki um skólastjórana þá Björn og Jón Pál sem hafa sýnt starfsfólki sínu einstakt traust og svigrúm til þess að taka aukna forystu í starfi.

Hérna má lesa greinargerð dómnefndar í heild sinni!

Ég vona síðan að ég eigi eftir að líta jafnvel út hún Ragnheiður Hermannsdóttir sem hefur verið við kennslu í 39 ár.

Ástarþakkir fyrir allar góðu kveðjurnar kæru vinir.

Virðing - Eldmóður - Gleði

2010-06-06T10:28:00.002Z

1 ár = pappír

...og það verður að sjálfsögðu haldið upp á það með því að fara á Holtið:)

2010-06-05T10:22:00.002Z

Kíktum með Ágústu í ævintýraskóginn en þangað fer hún alltaf með leikskólanum á mánudögum. Ævintýraskógurinn er lítill "skógur" efst í skíðabrekkunni við Dalbraut og þar læra börnin ýmislegt um náttúruna, fuglalífið og fleira. Ára elskar þennan skóg og lék á alls oddi:)

Uppstillt í myndatöku

Blása á fífil

Mæðgurnar

og feðginin

Dásamleg helgi framundan sem byrjar á bjölluæfingu með Álfinum mínum, við erum að tala um fáránlega mikla tilhlökkun að mæta, við skemmtum okkur nefnilega svo vel á þessum æfingum, lágmark eitt hláturskast á hverri æfingu!

5 vinnudagar og síðan 9 vikur í frí

Góða helgi!

2010-05-31T17:05:00.002Z

Sushi, hvítvín, brúðkaup og karokí!

Síðastliðið föstudagskvöld gerðum við Álfrún og Regína okkur ansi glatt kvöld:) Við Regína byrjuðum á því að gæða okkur á dýrindis Sushi og hvítu og þegar leið á kvöldið fannst okkur ekkert sniðugara en að við myndum horfa á brúðkaupið mitt aftur því hún og Álfur voru því miður ekki á landinu þegar þessi stóri dagur átti sér stað fyrir tæpu ári síðan.

Eins og góðum brúðkaupum sæmir var drukkið vín og að þessu sinni ekki nema "litlar" þrjár flöskur. Gestirnir tveir skemmtu sér vel og brúðurinn fékk tár í augun yfir sumum atriðunum. Gamanið stóð sem hæst þegar AFO kom heim úr vinnuhitting upp úr miðnætti en að hans sögn vorum við þá farnar að syngja í flösku og taka eurovision atriði, klárlega smá sinnep á þeirri frásögn en breytir því ekki að þegar gleðin stóð sem hæst fannst okkur alltof langt síðan við hefðum farið í karokí og skelltum okkur því á hverfispöbbinn Ölver. Þar var Regína að sjálfsögðu drottningin enda höfum við Álfur lítið í hana þegar kemur að söng. Ég lét mig samt hafa það að taka lokalag kvöldsins "The Winner Takes It All" sem segir allt sem segja þarf. Það voru ansi hressar stúlkur sem röltu í gegnum dalinn sinn undir morgun og þökkuðu fyrir að engin myndavél hafði verið í fórum þeirra þetta kvöldið:)

Takk fyrir dásamlegt kvöld yndislegustu og beztu vinkonur mínar!

2010-05-24T22:46:00.002Z

Svona eiga góðar langar helgar að vera...

Sætu mín og beztu tvö
Stórvinirnar Matthías og Ágústa

Kaupa fínt:)

Taka góða Fight gone Bad æfingu - tjékkið á AFO

okkur Álfi til mikillar mæðu var myndavél á staðnum og búið að setja á netið nokkrum tímum seinna!

Amerískar, egg, beikon og baunir nammi namm!

Þessi helgi er búin að vera eins og heil vika, við gerðum nefnilega svo mikið, kaffihús og grill með Álfi, Eld og Agli ásamt trampólín hoppi og rauðvíni, grill með Sóla, Elínu og Matthíasi, sund og allt sem því fylgir, sól og pulsa, lambalæri á grillið, ömmuGústudagur hjá Áru á meðan foreldrarnir tóku góða æfingu, sund og síðbúinn lunch...

og svo skemmir ekki fyrir að eiga nýja flík:)

svona eiga allar helgar að vera og hvernig væri nú að hafa bara 4 daga vinnuviku ALLTAF

Ég á eftir 14 vinnudaga og síðan er ég komin í 9 vikna FRÍ

set fleiri myndir á myndasíðuna undir MAÍ

-tjúrílú-

2010-05-19T23:18:00.002Z

Ég setti inn nokkrar myndir í maí - albúm og eiginlega ekki bara nokkrar heldur heilar 50!

Aldrei þessu vant verður bara family time um helgina og ekkert prógram - það verður dásamlegt!

xxx

2010-05-04T22:47:00.002Z

Viðburðarík helgi en ansi örmagna vika eftir á!

Litlu snúllurnar mínar þær Rebekka og Clara urðu Íslandsmeistarar í sínum flokki - (Rebekka er svona laundóttir mín-hef verið spurð nokkrum sinnum hvort ég eigi hana!)

Áran mín fékk sér hjólreiðatúr og kíkti á mömmu gömlu á danskeppninni:)

Og síðan en þó ekki síst, allra nýjasti vinur minn, 3. Láru og Bennson fæddist á sunnudaginn var, heldur mikið að flýta sér í heiminn þessi ungi maður en algjör hetja og ekki annað að sjá en hann sé bara vel tjillaður og sáttur með lífið og tilveruna, hvað er annað hægt með yndislega foreldra og tvo dásamlega bræður.

Ég var svo heppin að fá að knúsa hann í dag og jesús hvað þessi börn eru lítil þegar þau fæðast, talandi um að vera fljótur að gleyma - Ágústa Rut var nefnilega bara eiginlega nákvæmlega jafnstór honum þegar hún fæddist!

Núna er eiginlega búið að vera alltof mikið að gera hjá mér og ég verð að slaka stundum á - gekk örlítið fram af sjálfri mér en það er nú erfitt að kenna gömlum hundi að sitja, eins og það stendur!

2010-04-30T23:19:00.004Z

Hinar mjög svo árlegu Flórída-ferðir!

Tengdaforeldrar mínir komu frá Flórída í gær, Don Ruth og Lottó, alveg hreint klifjuð af ýmsu skemmtilegu dóti:) Ég var með nokkra hluti á lista fyrir mig, eins og t.d. Garmin hlaupaúr, MAC púður og maskara, PUMA skó og hina áðurnefndu brjóstahaldara. Don Ruth sér sko um sína því allt þetta kom upp úr töskunum ásamt ýmsum öðrum hlutum sem ég kann nú varla við að telja upp, já við erum nú ansi ofdekruð Laugarnesfamilían og þau rausnarleg með meiru, því er ekki neita!

Einkadóttirin hefur eignast fallegasta 17. júní dress sem um getur og nokkur skópör í viðbót ásamt ýmsum fínum sumardressum sem hún getur spókað sig um í sumar á nýja reiðhjólinu sínu en við AFO ákváðum að gefa henni tvíhjól með hjálpardekkjum fyrir sumarið og ég hef sjaldan séð jafn ósvikna hamingju og þegar hún var að prófa hjólið í Markinu.

Og þegar einhver kemur úr svona sólar-verlsunarferð þá fer maður að láta sig dreyma um sól og sumaryl í Svíþjóð með smá viðkomu í H&M:)

Ég er nefnilega að safna seðlum í sérLEYNIveski...þannig ég geti keypt mér eitthvað fallegt eins og t.d. þennan!

Góða danshelgi - mín verður í Laugardalshöll á Íslandsmeistaramótinu í samkvæmisdönsum og ég veit ekki af hverju en við það að vera á búningaæfingunni í kvöld þá fékk ég svona flashback þegar ég var alltaf að keppa og ég skellti bara á mig einni umferð af brúnkukremi áðan, bara svona for the fun of it - engin skinka samt eins og ungarnir mínir segja:) Svo það sé nú alveg hreinu!

2010-04-26T17:31:00.003Z

Sumarfrí!

Fyrstu sjö samvistarárin okkar AFO einkenndust af litlu sem engu sumarfríi, við vorum auðvitað alltaf í sumarvinnu til að drýgja tekjurnar fyrir skólaveturinn og síðan var hann auðvitað í boltanum og komst hvorki lönd né strönd. Við vorum heppin ef við náðum sólarhring í bústað en þá var alltaf komið seint að kveldi eftir æfingu og farið fyrir æfingu næsta dag.

Núna hefur þetta heldur betur breyst, ég með mitt "kennarafrí" eins og einhverjir vilja kalla það og Andri með sínar fimm vikur. Þannig að við erum að sjálfsögðu byrjuð að skipuleggja. Fyrstu drög líta svona út:

Fyrstu þrjár og hálfa vikuna verð ég svo gott sem ein í fríi, AFO enn að vinna og ÁRA á leikskólanum - þá ætla ég sko heldur betur að slaka á, mæta á hlaup- og bjöllu-æfingar, endurskipuleggja skápa og taka heimilið alveg í nefið. Verð samt örugglega með einhverjar sumardansæfingar inni á milli.
Daginn eftir að AFO byrjar í fríi eða þann 8. júlí höldum við hjónakornin í paraferð til Stokkhólms þar sem við munum dvelja í góðu yfirlæti hjá Helga og Gunnu, borða góðan mat, drekka góð vín, flatmaga á klettunum og ef buddan leyfir kíkja bara ogguponsulítið í búðir.
Að lokinni Stokkhólsferð ætlum við að fara með Auði Öglu stórvinkonu og hennar þremur piltum í sumarbústað í nokkra daga.
Andri B. sem vinnur með AFO er búinn að bjóða okkur að koma á Mærudaga á Húsavík síðustu helgina í júlí og það verður svona óvæntasta í sumar, ég hef aldrei komið þangað og eiginlega bara varla stigið fæti á Norðurlandið og á þó ættir að rekja á þessar slóðir. Algjör óvissa í gangi þar en mikil spenna og ekki síður að sjá hvernig litli bíldólgurinn okkar fílar langferðina.
Toppurinn á sumrinu verður síðan Klofi Tómasar frænda en eins og flestir vita er Klofahátíðin um verslunarmannahelgina.

It's summertime....fyrir utan allt annað sem er alveg óplanað þá lofar þetta mjög góðu!

2010-04-18T20:58:00.002Z

Af nógu að taka...

Kettlebells - Nýtt æði?

Ég og Álfurinn minn skelltum okkur í byrjendatíma í Kettlebells síðast liðinn fimmtudag og vorum ekki sviknar - af harðsperrum:) AFO er búin að stunda þetta samhliða Jiu Jitsu-inu og líkar vel og mig hefur vantað eitthvað með hlaupunum til að styrkja mig. Þrusugóðir tímar og ekkert gefið eftir en samt getur hver og einn stjórnað þyngdinni sem hann er með eins og ég var alveg bara í léttustu bjöllunum enda langt síðan ég hef verið að styrkja mig að ráði. Síðan fannst mér alveg ljómandi skemmtilegt að leyfa einhverjum öðrum að þræla mér út og góð tilbreyting frá því að vera sjálf að píska fólki áfram. Við fórum síðan aftur í tíma í gær og áðan hnerraði ég og langaði að grenja út af harðsperrum! Núna eigum við sex mánaða kort og verðum með alveg asskoti flottar línur í sumar!

Meðeigandi í dansskóla

Það er verið að ganga frá samningi um hlutafé mitt (og AFO auðvitað) í dansskóla sem hljómar mjög svo fullorðinslegt en um leið ótrúlega spennandi. Meira um það síðar en það er nóg að gera í dansinum núna fyrir Íslandsmeistaramótið með grunnaðferð sem verður helgina 1. og 2. maí.

Tengdó á Flórída

Sem kemur kannski fáum á óvart enda árlegur viðburður á þeim bænum. Ég þykist vita að búðirnar verði sóttar heim og flatmagað við sundlaugarbakkann. Ég nefndi það við Don Ruth að ef hún sæi einhverja almennilega brjóstahaldara þarna úti fyrir tvo litla tepoka þá mætti hún endilega kaupa fyrir mig, hún tók þessu greinilega mjög alvarlega og er nú þegar búin að fjárfesta í einum þremur stykkjum, öllum með góðum fyllingum:)

Áran mín klára

Er alltaf sami fallegi gullmolinn og kemur okkur sífellt á óvart með húmor og dugnaði. Hún er orðin heldur betur stór og sjálfstæð stúlka og alveg svakalega dugleg. Í kvöld t.d var ég að ganga frá þvotti og þá spyr hún hvort hún eigi ekki að hjálpa mér og tekur alla sokkana og raðar þeim réttum saman á ofninn, ekki dóttir mömmu sinnar fyrir ekki neitt! Hún er alveg hætt að sofa á daginn og er alltaf að höndla það betur og betur (ekki eins mikið um þreytu/pirring seinnipartinn) og á það til að sofa bara fram eftir um helgar (með fram eftir á ég við að ganga hálf tíu). Hún er líka dugleg að kalla í okkur foreldrana og taka hópknús og það er ekkert betra en slíkt knús:) Um helgina fórum við á Skoppu og Skrítlu og það vakti þvílíka lukku og ekki skemmdi fyrir að fá að setjast hjá þeim og meira að segja Lúsí líka.

Fullt af nýjum myndum í apríl 2010 á www.123.is/agustarut

2010-04-02T10:51:00.003Z

Lestur góðra bóka

Þegar ég var yngri las ég eins og vindurinn, ég spændi upp bókasafnið í Laugarnesskóla og taldi óeðlilegt ef ég var ekki með einhverja góða bók í farteskinu. Eftir því sem árin líða fer minna fyrir þessu, ég er þreyttari á kvöldin, gef mér minni tíma eða öllu heldur hef ekki tíma yfir daginn og þar frameftir götunum. Ég er nefnilega ekki eins og eiginmaðurinn sem virðist geta dottið í góða bók hvar sem er og hvenær sem er, ég þarf að setja mig í ákveðnar stellingar að nú sé ég að fara að lesa! Eftir að hafa klárað síðustu Stieg Larson bókina um jólin byrjaði ég á bókinni Þúsusnd bjartar sólir sem er átakanleg saga ungra kvenna í Afganistan, ég veit ekki hvort það er bara yfir höfuð erfitt að byrja á bók eftir Salander ævintýrið sem maður óskaði að engan enda tæki eða hvort þetta var bara grámyglan í janúar og febrúar sem gerði það að verkum að ég komst bara hálfa leið með bókina og var þar af leiðandi einhvern veginn búin að missa þráðinn þegar ég byrjaði að lesa aftur tæpum mánuði seinna. Í milli tíðinni byrjaði ég líka á bókinni Rán en komst einhvern veginn ekkert áleiðis.

Núna hins vegar sér ég fram á bjartari tíma í lestri góðra bóka. Eva María benti mér nefnilega á rithöfundinn Camillu Lackberg og fyrstu bók hennar Ísprinsessuna sem kom út árið 2003. Bókin so far lofar góðu og ég sé fram á gott vor og sumar vitandi að mín bíða fjórar aðrar bækur eftir sama höfund:) Spurning um að æfa sig í sænskunni svona áður en við förum í paraferðina í byrjun júlí!

Ég setti síðan restina af marsmyndum á myndasíðuna. Hér að neðan má sjá hluta af mjög svo eðlilegri fjölskyldu í bústað þar sem voru teknar ýmsar keppnisgreinar, þar á meðal 90 gráðu keppni en systurnar gáfust upp í öfugri aldursröð og AFO löngu fyrr:) Fleiri góðar keppnisgreinar má sjá á myndasíðunni. Njótið vel og gleðilega páska.

Eins og sjá má lagði frumburðurinn sig mjög mikið fram!

2010-03-27T09:21:00.002Z

Páskafrí og bústaðaferð!

Langþráð páskafrí er runnið upp og við stefnum í bústað á gossvæðinu nánar tiltekið á Strandavöllum. Fröken Ára var eitthvað slöpp í gærkvöldi eftir ansi ærslamikla sundferð og kvartaði um í eyranu, barnið sem fær alltaf í lungun en aldrei í eyrun en fínn læknir kannaði málið og smá bólga sást en ekki þannig að stöðva þyrfti bústaðaferðina sem betur fer, alveg hefði það verið týpískt fyrir okkur að komast ekki. Við erum búin að vera hrikalega upptekin bæði undanfarið, vinnulega og ekki síður félagslega, árshátíðir, partý, leikhús og fleira fyllir upp í stundatöfluna okkar sem er auðvitað bráðskemmtilegt en síðan er ekki síður skemmtilegt að komast út fyrir borgarmörkin í rólegheit og afslappelsi:)

Ég var að setja inn MarsMyndir og myndir sem við fengum frá leikskólanum.

Við Andri eigum síðan pantað flug til Stokkhólms þann 8. júlí, nánast sami dagur og við fórum í fyrrasumar nema núna verður þetta eðal paraferð með Helga og Gunnu - Ára verður í góðu yfirlæti á Íslandi hjá ömmum, öfum og frænkum í heila viku, dáldið langur tími en fargjaldið var það sama fyrir þrjá daga og viku og þá er þetta eiginlega ekki spurning!

Vinsælt sport - þvottkörfuleikurinn

2010-03-22T14:58:00.002Z

Ég á afmælisAndra í dag og óska honum alveg innilega til hamingju með 28 árin:)

Það þarf varla að taka fram hve yndislegur og dásamlegur hann því þeir sem þekkja hann vita að fallegri og betri mann er ekki hægt að finna á jarðríki! Smá kvót í gömlu dagbókina mína sem segir allan sannleikann!

Njóttu dagsins minn allra kærasti eiginmaður!

2010-03-15T20:58:00.003Z

Vor í lofti?

Það væri alveg dásamlegt ef vorið væri bara komið og allur snjór og kuldi farinn þangað til kannski bara í janúar á næsta ári:) Bjartsýn, já ég held það bara. Með vorinu hefjast útihlaup aftur, við gátum hlaupið ótrúlega lengi fram á veturinn eða nánast alveg fram til jóla. Síðan hafa janúar og febrúar mánuður varla boðið upp á útihlaup en nú eru þú formlega hafin aftur sem þýðir að ég þarf að fara að setja mér markmið fyrir sumarið. Stefnan er að hlaupa þrisvar í viku og auka það síðan þegar líður á sumarið og taka kannski þátt í aðeins fleiri hlaupum en bara maraþoninu í ágúst.

Undanfarin tvö skipti sem ég hef sett mér markmið í þessum hlaupamálum hef ég náð þeim sem er alltaf ánægjulegt en núna finn ég að mig langar að setja mér óraunhæf markmið þannig ég ætla íhuga málið vel áður en ég pósta þeim:)

Ég er búin að vera með kennaranema hjá mér í vinnunni undanfarnar þrjár vikur sem er notalegt, þá er ég meira á kantinum að fylgjast með. Mjög svo fullorðinslegt allt saman.

Og meira fullorðinslegt, ég er líka að fara að taka þátt í rannsóknarstofu um menntastjórnun, nýsköpun og mati á skólastarfi! Einhvers staðar verður maður að byrja og þetta er fínn grundvöllur enda stefni ég á einhvers konar stjórnun í framtíðinni í hvaða formi sem hún verður nú!

Já maður er ekki að yngjast neitt það er nokkuð ljóst, er ekki frá því að ég sé að fá smá svona poka yfir augun og nú lýg ég ekki, finn hvernig augnlokin á mér eru farin að þyngjast enda er þetta ákveðið ættarmerki að vera eiginlega ekki með nein augnlok og þessa vegna hef ég aldrei getað verið með eyeliner eða neitt slíkt, klessist alltaf saman!

En við á Laugarnesveginum erum bara nokkuð bjartsýn og jákvæð og erum búin að plana matseðil fyrir vikuna sem er alltaf gott svona í ljósi umræðna sem ég hef átt við ýmsa um það að undanförnu:)

Í kvöld var t.d. grilluð bleikja með rosa góðri jógúrtsósu ala AFO - á morgun er ég reyndar að fara á Ítalíu en það er önnur saga....

kvitt eru alltaf vel þegin!

2010-03-07T22:51:00.002Z

3 Ára afmælismyndir eru komnar á myndasíðuna:)

Þessi yndisfríða stúlka er sko ekki dóttir móður sinnar fyrir ekki neitt og elskaði að eiga afmæli og var ekki alveg að átta sig á því að í dag væri þetta búið og hún ætti ekki lengur afmæli:)

Við þökkum öllum fyrir komuna og dömuna sem áttu leið hjá um helgina - samkvæmt mínum útreikningum voru þetta um 75 manns. Mikið erum við nú heppin að eiga svona marga góða vini og fjölskyldu, alveg hreint ómetanlegt. Þeir sem lögðu síðan hönd á plóg með veitingar eiga þúsund þakkir skildar því maður hristir nú ekki svona fermingarveislu fram úr hendinni eins síns liðs, að minnst kosti ekki ég:)

2010-03-06T10:40:00.002Z

3 Ára:)

Dásamlega stúlkan okkar sem dýrkaði að vera í sviðsljósinu í fjölskylduafmælinu í gær. Kærar þakkir fyrir dömuna allir saman!

Og snemma í morgun að opna frá ma og pa - alveg með aldurinn á hreinu!

BINGÓ spil og stærðfræði sett:) Stærðfræðikennarinn fékk að ráða hluta af gjöfinni!

Til hamingju með daginn elsku besta Áran okkar sem hefur fært okkur óendanlega mikla gleði og hamingju.

2010-03-03T21:04:00.003Z

Febrúarmánuður er í óðaönn að hlaðast inn á myndasíðuna:)

Undirbúningur fyrir the BIG 3 stendur í hámarki, DORU þemað kom frá Ameríku í gær og mér skilst að daman fái Doru kjól í afmælisgjöf sem mun vekja mjög svo mikla lukku.

Ég, Sía og Ára bökuðum tæplega 100 mini cup cakes á föstudaginn og í kvöld er það Rice Crispies og eplakökurnar á morgun ásamt fleiru og fleiru. Síðan er ég svo heppin að hafa heilan haug af fólki í kringum mig sem er til í að gera ýmislegt fyrir mig:)

Þessi unga dama elskar ekkert meira en að "snyrta sig" með mömmu sinni og setur þá á sig ýmis krem og gloss og meira að segja svitalyktaeyði:)

Hún á síðan alveg golden moment inn á milli eins og t.d. þetta þegar hún var að horfa á Stundina okkar:

Ára: Mamma, er stærðfræði nokkuð leiðinleg?

Ég stærðfræðikennarinn sjálfur svara: Nei auðvitað ekki, hún er mjög skemmtileg, hver er að segja að stærðfræði sé leiðinleg? (furða mig á því hver sé að innræta barnið slíkri endemis viltleysu)

Ára: Björgvin Franz er að segja að stærðfræði sé leiðinlegt!

Annars er þetta mynd mánaðarins af dásamlega skemmtilegri og jákvæðri fjölskyldu sem kom í kjötsúpu á dögunum og Úlfar Jökull fékk lánuð prinsessunáttföt og bleika duddu og var að fíla sig vel:) Óli "Calm" var eins og ljós og sat í fanginu á pabba sínum í hátt í klukkutíma án þess að segja múkk! Ótrúlegur drengur:)

Kommentakerfið hefur breyst eilítið en er langt því frá að vera hætt að taka við kommentum þannig að endilega kvitta fyrir komu og kíkja á febrúarmyndir

aðíós

2010-02-25T10:14:00.002Z

Ég veit ekki hvað þið eruð dugleg að kíkja inn á myndasíðuna en þar eru tvö nýleg albúm, Áramót og Janúar 2010. Febrúar bíður síðan glóðvolgur.

Set hérna eina af fallegu stelpunni okkar sem er bara alveg að verða þriggja ára:)

2010-02-15T21:37:00.002Z

Hér á bæ máta menn búninga í gríð og erg fyrir öskudaginn...

Heimasætan vill ólm vera Batman en heimtar grímu! (hún gerir sér náttúrulega ekki grein fyrir að flestar hinar stelpurnar verða prinsessur og því verður sá búningur með í poka;))
Eiginmaðurinn spilaði í fjölda ára sem fagurblár fótboltamaður en hefur nú skipt yfir í fagurbláa Jiu Jitsu hetju:)

Þið fáið tvær myndir núna því ég stóð ekki við loforðið með að setja á myndasíðuna, nota vetrarleyfið pottþétt til að flokka og raða í það dæmi!

2010-02-12T13:17:00.002Z

Aldurstakmark í "föstudagstrít"?

Ákvað í tilefni föstudags, námsmatsloka og fleira að panta mér eina litla 12 tommu núna í hádeginu, indælisstúlka svarar í símann og segir: "já, hvað ertu gamall?" Einmitt, ég er 27 ára sagði ég frekar pirruð á þessari fáránlegu spurningu, eina sem ég fékk tilbaka var að ég hefði hljómað einhvern veginn öðruvísi. Þetta aldursdæmi ætlar engan endi að taka hjá mér, það er nokkuð ljóst!

Annars eru ekki nema 21 ár í dag síðan hún Harpa frábæra systir mín leit dagsins ljós í bandbrjáluðu veðri og rafmagnsleysi sem er eins langt frá því að lýsa hennar geðgóða skapi og mögulegt er. Innilega til hamingju með daginn elsku Harpa:)

Ég er síðan búin að hlaða slatta af myndum inn á tölvuna og á bara eftir að koma þeim á myndasíðuna, ný myndavél komin í hús svo nú ætti ekki að vera neitt lát á myndum. Setti nokkrar áramótamyndir um daginn en lofa að bæta hinu við um helgina, nú þegar námsmatinu er senn að ljúka og vetrarleyfi á næstu grösum. Þarf endilega að gera mér einhvern almennilegan do to lista fyrir það frí, ansi mikið sem hefur setið á hakanum í annríkinu síðustu misseri. Þannig að mín afsökun fyrir blogg og myndaleysi er "brjálað að gera afsökunin" sem er kannski orðin þreytt en það er bara stundum nóg að gera í 50 stunda vinnuviku, ein tæplega þriggja ára og heimilishald.

Hafið það annars gott um helgina:)

2010-01-23T12:56:00.003Z

London...

Dásamleg ferð í alla staði, flottasta hótel í heimi, frábær ráðstefna og búðirnar teknar með trompi:) Þrjár flíkur hvað...

Fyrstu H&M pokarnir að detta í hús

Smart-board - gæfi handlegg fyrir eina slíka í stofu 17

Full English breakfast, ég veit ég er sveitt í framan, það var drulluheitt þarna og síðan hef ég verið ferskari en var alveg nývöknuð!

Komnar í okkar fínasta og leið á franskan veitingastað

Það þurfti mikið skipulag til að koma öllu dótinu heim og sumir "hummnefnienginnöfn" þurftu að fá sér aukatösku

Mojito á líbönskum stað og já það var þema hjá mér að vera sveitt á myndum:)

Snilldarferð í alla staði en erfitt að mæta beint í kennslu á mánudeginum og Áran búin að vera veik alla vikuna, komin með sýkingu í lungun, það er svona hefðbundið janúardæmi hjá okkur:) Hún er samt öll að hressast og stefnir ótrauð á leikskólann á mánudaginn.

2010-01-11T21:44:00.004Z

London calling...

Það virðist vera orðinn "árlegur viðburður annað hvert ár" að skella sér til London í janúar. Fyrir tveimur árum skelltum við Andri okkur í kærustuparaferð í kjölfarið á nýsamþykktu kauptilboði okkar í Laugarnesveginn. Eyddum nú ekki miklum pening af hræðslu við þessa stóru ákvörðun okkar að kaupa íbúð en áttum í staðinn mjög svo huggulega ánbúðarápsferð (samt í pundinu 122 kr.ísl):)

Núna er eina von mín til að komast í ferð til London sjálfur Vonarsjóður Kennarasambands Íslands sem styrkir einstakling á tveggja ára fresti um 140.000 kr. í námferðir, nám og annað slíkt. Ferðinni er heitið á BETT sýninguna í samfloti við 12 aðra kennara úr mínum skóla og í ljósi þess að ég er nýkomin með skjávarpa í stofuna mína er ekki seinna vænna að kynna sér öll helstu trikkin í kennslu gegnum tæknina!

Það vildi svo til að Iceland express þurfti að fella niður flugið okkar og þar af leiðandi "neyddumst" við til að fara degi fyrr. Fyrstu nóttina verður við á þessu hóteli og næstu þrjár á þessu. Mér skilst að það sé kuldi í Bretlandi, ekki einungis í garð okkar Íslendinga heldur líka svona almennur kuldi og snjór og því verða hlýju fötin tekin með og flíssloppurinn minn svona ef maður dettur í Spa-ið á hótelinu;)

Annars ætla ég að eyða sem minnstu, Ára á feykinóg af fötum en óskar sjálf eftir Dóru sokkum, buxum og bol og vonandi get ég orðið við þeirri ósk. Kaupi líka örugglega nærföt og sokka á hana. Ætla leyfa mér þrjár flíkur á skikkanlegu verði (það hlýtur að vera hægt - pundið komið í 199 kr. ísl) en bara ef ég finn eitthvað sem ég verð að fá, tek tæknina okkar Sóleyjar á þetta.

Annars er þetta rugl með pundið, fór með 15.000 kall í bankann í dag og fékk skitin 75 pund fyrir!

En svona ferð lyftir svo sannarlega janúarmánuði upp um nokkrar hæðir - því er ekki hægt að neita.

2010-01-06T18:37:00.002Z

Dagbækur...

Sem mikill aðdáandi dagbóka þarf ég alltaf að byrja árið á einni slíkri. Ég hef velt fyrir mér formi, stærðum, línum, gormum, kostum og göllum dagbóka síðan ég var ca. 12-13 ára en þá bjuggum við Auður Agla alltaf til okkar eigin bækur því við vorum svo smámunasamar um hvernig við vildum hafa þær. Ég á síðan bækur frá öllum þessum árum í kassa og hef það aldrei í mér að henda þeim.

Í fyrra komst ég í kynni við þá beztu sem ég hef fundið hingað til - dagbók Íslandsbanka eða Glitnis (man ekki hvort það var búið að breyta). Þessi dagbók er í A5 broti, jafnvel örlítið stærra, er búin til úr endurunnum pappír og prentuð á Ítalíu. Hún inniheldur hverja viku á einni opnu, auka línur fyrir neðan til að skrifa punkta, yfirlitsdagatal í upphafi, minnisblöð í lokin, er í kápu en samt með gormum. Sem sagt í einu orði - fullkomin!

Nú fyrir jólin fór ég að sjálfsögðu að huga að bókinni fyrir 2010, hringdi símtöl í bankann til að kanna hvort hún væri komin, gerði mér ferð milli jóla og nýárs til að ná í mitt eintak en allt kom fyrir ekki, bókin skilaði sér ekki fyrir áramót og mín gamla bara til 3. jan! Ó mæ god terror fyrir dagbókarfólk sem skrifar fram í tímann. Til allrar hamingju var hún komin í gær og þjónustufulltrúinn minn svo almennilegur að láta mig fá eitt eintak því eftir því sem ég bezt veit er legið á þessu eins og gulli enda eðalbækur og ekki ódýrar í framleiðslu. Þið getið því rétt ímyndað ykkur spenninginn og tilhlökkunina þegar ég byrjaði að krota inn í hana í gær, afmælisdaga, hittinga, London ferð og þar fram eftir götunum.

En hvað haldiði að hafi legið á borðinu þegar ég kom heim úr vinnunni - Splunkuný rauð dagbók með gull áletrun á þar sem stóð Andri Fannar Ottósson, ég ætlaði ekki að trúa mínum eigin augum! Þá hafði hann fengið þetta frá vinnunni sinni takk fyrir, bókin hefur allt sem mín bók hefur að bera að undanskildum gormunum sem gera sko gæfumuninn því þá getur maður lagt hana frá sér í brotinu sem er ekki hægt með Andra bók en gulláletrunina gæfi ég nú mikið fyrir, segi nú ekki annað!

Lifi dagbókin!

2010-01-02T11:00:00.009Z

Áramótaannáll

Gleðilegt nýtt ár kæru vinir! Við fögnum alltaf samvistarafmæli okkar á sama tíma og ár mætast og nú eru komin hvorki meira né minna en 10 ár, sem er vonandi bara dropi í hafið miðað við það sem koma skal:)

Á árinu 2009 stendur brúðkaupið okkar þann 6. júní að sjálfsögðu upp úr, ásamt fermingu og útskrift systra minna. Við fórum líka í frábæra ferð til Svíþjóðar og Ítalíu og eyddum rúmum tveimur vikum með yndislegum vinum okkar. Bústaðaferðir, leikhúsferðir, afmæli, Klofi Annan og fleira skemmtilegt stendur líka upp úr ásamt fæðingu nokkurra barna í vinahópnum. Dóttir okkar sem verður þriggja ára næstkomandi mars hélt líka áfram að bræða hjörtu marga og er alveg einstaklega dugleg og skemmtileg að okkar mati sem er að sjálfsögðu alveg hlutlaust mat:)
Svipleg fráföll afa Eggers og Óskars settu að sjálfsögðu sinn svip á árið en lífið gefið og lífið tekur, þannig er það nú bara.

Við erum ótrúlega þakklát fyrir að eiga yndislega og góða fjölskyldu og vini, vera heilsuhraust og hafa góða vinnu.

Hér að neðan má sjá árið í myndum sem segja auðvitað allt sem segja þarf og lesandi góður ef þú sérð þig jú eða þína á mynd, viltu vera svo vænn að kvitta fyrir í tjáðu þig. Það gleður:)

Janúar

2010-01-02T10:43:00.007Z

Febrúar

2010-01-02T10:12:00.010Z

Mars

2010-01-02T09:38:00.009Z

Apríl

2010-01-01T23:29:00.008Z

Maí

2010-01-01T22:28:00.012Z

Júní

2010-01-01T21:08:00.014Z

Júlí

2010-01-01T19:52:00.015Z

Ágúst

2010-01-01T19:41:00.006Z

September

2010-01-01T13:22:00.007Z

Október

2010-01-01T13:04:00.006Z

Nóvember

2009-12-31T14:35:00.011Z

Desember

2009-12-29T00:45:00.003Z

Jólajól....

Jólin hafa verið dásamleg í alla staði og við LA-fam þökkum öllum kærlega fyrir okkur. Gjafir heimasætunnar hlupu á nokkrum tugum og spenningurinn eftir því. Hún er búin að átta sig á því út á hvað þetta gengur og opnaði gjafir eins og enginn væri morgundagurinn!

Rut, Ottó og Malla borðuðu með okkur og Grunnararnir komu svo í ísinn. Ég, Andri, Harpa og Svava fórum síðan í miðnæturmessuna í Fríkirkjunni sem er algjörlega ómissandi á kvöldi sem þessu.

Jóladagur og annar í jólum fóru í afslappelsi og skemmtileg jólaboð og hitting okkar LA stúlkna.

Myndir eru í óðaönn að hlaðast inn á myndasíðuna:)

Árámótaannállinn verður á sínum stað enda afar viðburðaríkt ár með fermingu, útskrift og brúðkaupi hjá okkur systrum. Verður erfitt að toppa 2009, að minnsta kosti hvað varðar veisluhöld.

2009-12-23T21:03:00.002Z

Þorlákur...

Ansi viðburðaríkur dagur hjá okkur mæðgum, hófst með heimsókn til langalöngu Ágústu, ferð upp í dansskóla til að horfa á paso tíma, viðkoma á Þjóðminjasafninu til að berja Ketkrók augum, hádegisstopp hjá Auði og drengjunum dýrlegu og svo að sækja AFO í vinnuna.

Þegar heim var komið bjó eiginmaðurinn til heitt súkkulaði og við gæddum okkur á flatkökum og hangikjöti, tókum smá tiltekt, settum jóladúkinn á borðið og tókum af rúmum. Ég og Ára fórum út í garð og tíndum allt ruslið og frusum næstum í hel á meðan, þökk sé nýju úlpunni minni að ég varð ekki úti!

Enduðum síðan á árlegum sið - Hamborgarabúllunni með Gumma frænda og Haffa frænda þar sem við gúffuðum í okkur góðum borgurum - skata hvað?

Núna er einkadóttirin sofnuð, bóndinn í bænum að redda síðustu gjöfinni *blikk blikk*, ég búin að kveikja á kertum, bara eftir að setja hreint á rúmið og síðan mun ég leggjast upp í og halda áfram með Larsoninn - tæpar 400 síður komnar og ég rétt rúmlega hálfnum!

Búllustemning
Áran hress með sinn burger

2009-12-20T08:28:00.002Z

Nýjar myndir www.123.is/agustarut í desember

Meðal annars frá herrakvöldi AFO, piparkökubakstri, sörubakstri, jólaballi, piparkökuskreytingum og fleiru - þigg kvitt í gestabók:)

Annars jólastemningin í hávegum höfð hérna á Laugarnesveginum, við þrjú komin á ról, búin að skreyta jólatréð og búið að bóna dúkinn. Ekkert sérstakt sem á eftir að gera næstu daga nema kaupa aðeins inn í matinn, annars bara afslöppun og notalegheit.

2009-12-17T15:25:00.002Z

Hún er búin að fatta þetta!

Það tók ekki nema þrjá daga fyrir Áru að átta sig á því að það kæmi gjöf í skóinn á hverjum degi og núna þurfum við ekkert að minna hana á þetta eins og fyrstu dagana, núna er bara rise and shine 6:30 (jú var betra þegar hún fattaði ekki og svaf lengur:)) og tjékkað í skóinn.

Í morgun rauk hún fram og kallaði "Ég er búin að fá!" Við svöruðum mjög svo svefndrukkin hvort hún vildi ekki koma til okkar og sýna en það stóð ekki á svörunum: "Neibb ekki þarna inni í dimmunni!" Ætlaði sko að ná foreldrum sínum fram! Síðan lét hún nú eftir og kom og kveikti ljósið og sýndi okkur en þolinmæði um að fá pabba sinn fram var nú ekki meiri en svo að hún sagði: "hey pabbi komdu, ég nenni þessu sko ekki!" Við vitum bæði upp á okkur sökina að þetta er eittthvað sem við segjum bæði þegar hún hlýðir okkur ekki:)

2009-12-15T23:29:00.002Z

Ég á það til að vera óttalegur hrakfallabálkur...

eins og í morgun, þegar ég fór í þriðjudagshlaupið 6:45. Ég var í virkilega góðum gír þrátt fyrir aðeins fimm og hálfs tíma svefn því ég er komin í svo mikið jólajóla og vaki lengi. En til að gera langt hlaup stutt þá var ég komin á Laugarásveginn og búin með rúma fimm km og því aðeins tæpur km til stefnu, ég var í fíling með unglingapopp í eyrunum og á góðri ferð. Þá sé ég konu í fjarska með stóran svartan hund sér við hlið, eins og flestir vita er mér illa við dýr og sérlega við ókunna hunda svo ég hugsa með mér að það sé nú best að fara rétt út á götuna þegar ég mæti þeim.

Sú snilldarhugmynd mín endar nú ekki betur en svo að ég ligg í götunni eftir að hafa flækst í svörtu járni sem einhver hafði hent á götuna og ég festi báða fætur í og lendi illa á olnboganum og mjöðminni ásamt því fá blæðandi sár á báðum hnjám! Já ég veit snillingur! Ég stend upp og harka þetta af mér en með ansi ljótt sár á mjöðminni og frekar illt í hendinni. Ég sé skólastjórann nálgast mig úr fjarska og hugsa hvað það sé mikil synd að þurfa að labba tilbaka en síðan kom keppnisskapið yfir mig og ég hugsaði með mér að ég færi nú ekki að láta hann fara á undan mér svo ég klára hlaupið samferða honum í heldur miklu adrenalínkasti!

Hefði nú kannski betur sleppt því, því þegar heim var komið leit þetta illa út, peysan mín hafði líka rifnað og AFO átti ekki orð yfir þessu, heimilið átti enga plástra nema Dora Explorer svo ég hélt til vinnu með Dóru á hnjám, mjöðm og olnboga. Sem betur fer var Lilja hjúkrunarfræðingur við svo ég fékk góða meðhöndlun og er nú vel grisjum á fjórum stöðum. Verkurinn í hendinni fór síðan versnandi með deginum en Sía bjargaði því með íbúfeni því við máttum ekki láta deigan síga vegna Sörubakstur sem við höfðum planað.

Ég var smá súkkulaði til að byrja með enda með fulla örorku en Sía kepptist við að blanda kremið og þeyta eggjahvítur og rauður og þá hófst eiginlega vinnudagur nr. tvö því við kepptumst við í Sörubakstri frá fimm til að ganga ellefu og enduðum að ég held með yfir 200 sörur! Ég á tvöföldum íbúfen á fjögurra tíma fresti og Sía í kaffinu en þetta gekk vel og við erum nú þegar búnar að skipuleggja bakstur fyrir næstu jól:) Takk fyrir frábært kvöld Sía og þó þú haldir annað þá kann ég alveg að baka:)

Það er samt nokkuð ljóst eftir daginn að ég er hvorki að fara að bera fótleggi mína né handleggi þessi jólin og þarf klárlega að finna mér eitthvað nýtt dress sem hylur mig alla!

Myndir af bakstri og fleiru koma inn á morgun.

2009-12-14T14:58:00.002Z

Fyrsta lifandi tréð okkar er komið út á svalir...

Völdum okkur ljómandi fínt tré í gær og núna klæjar mig í fingurna að fara að setja það upp en þarf að bíða fram á næsta sunnudag en þá verður búið að bóna dúkinn okkar og svona, haldiði að það verði huggulegt á Laugarnesveginum, nýbónað gólf og lifandi stórt tré:)

Niðurtalning í jólafrí er sko hafin og núna eru ekki nema fjórir vinnudagar eftir, fjórir easy vinnudagar, kaffihúsaferð, félagsvist og litlu jól. Það held ég nú!

Ég hef sjaldan verið í jafnmiklum jólaspenning og hlakka ótrúlega mikið til að vera fyrstu jólin heima hjá okkur.

2009-12-11T20:28:00.002Z

Ég held að dóttir okkar sé ekki alveg að fatta "conceptið" jólasveinn...

í dag sagðist hún vilja flatköku í skóinn og rétt í þessu vildi hún kartöflu. Núna er búið að stilla gamla skónum sem ungfrú móðir bjó til á leikskóla fyrir ca. 25 árum úti í stofuglugga. Ára vill nefnilega ekki hafa hann inni hjá sér:)

Verður spennandi að sjá þegar hún sér Snuðru og Tuðru bókina frá Stekkjastaur í fyrramálið!

2009-12-10T17:27:00.003Z

Það voru nú heldur betur stoltir foreldrar...(varist að lesa ef þið eruð viðkvæm fyrir grobbi)

sem gengu út úr Heilsugæslunni í Glæsibæ í dag. Einkadóttir þeirra hafði nýlokið við tveggja og hálfs árs skoðun og kom svona líka glimrandi vel út og skoraði fullt hún stiga. Við vissum auðvitað að hún væri klár stelpuskottan en ekki snillingur! DJÓK

En að öllu gamni slepptu þá stóð hún sig alveg ferlega vel og undirrituð fékk tár í augun þegar kjaftaði af henni hver tuskan við hjúkkuna þegar hún var að teikna mynd af sér að róla og hún var í rólunni og mamma og pabbi voru fyrir aftan að ýta og svo bætti hún við rigningu og prinsessurúminu, sænginni og lakinu sínu. Gerði síðan frekar bjagaðan tölustaf nr. 2 og sagði að hún væri tveggja ára:)

Þekkti alla litina og gat bara gert allt sem hún var beðin um:) Fyndnast fannst mér þegar hún átti að segja eins og hjúkkan: "Við drekkum mjólk" Áran mín enginn mjólkuþambari og svaraði um hæl: "Ég drekk djús!"

Ég leyfi mér að taka eitt svona montkast í þetta sinnið enda yfir mig ánægð með litlu skottuna mína...

2009-12-07T20:37:00.002Z

Að vera búin með allt...

Ég ákvað að vera heima í dag til að gulltryggja mig að streptó vinir mínir yrðu endanlega farnir á morgun. Ég held að það hafi verið nokkuð skynsamleg ákvörðun hjá mér, ég að tala stanslaust frá 8-14:30 hefði verið frekar óskynsamlegt, breytir því samt ekki að samviskubitið hleðst upp hjá manni en svoleiðis er það nú bara einu sinni. Nú vona ég bara að dóttir og bóndi hafi ekki smitast af mér enda óendanlega leiðinlegir þessir streptókokkar. Pensilínátið gengur vonum framar og gerlarnir A og B fá að fljóta með hverri pillu.

En að jólaundirbúningi, ég held að hver einasta kona þekki þá tilfinningu að vilja vera búin með allt og þá helst í gær. Ég er alltaf að reyna að venja mig af þessu að vilja klára allt til að eiga ekkert eftir, held ég hafi erft þetta frá tengdamóður minni sem er snillingur í að KLÁRA! Núna er hún t.d. búin að pakka öllu inn og skreyta jólatréð, geri aðrir betur. Ég byrjaði að pakka inn nokkrum gjöfum áðan, bara svona til að byrja og þá kom þessi tilfinning yfir mig að ég yrði bara að klára að pakka öllu inn sem ég er búin að kaupa en sem betur fer var límbandið búið og þess vegna gat ég ekki klárað. Ég verð að venja mig á að njóta "mómentanna" meira. Það verður áramótaheitið í ár.

Annars er ekkert stress á þessu heimili fyrir jólin, allar gjafir úthugsaðar og ekkert stress með það. Jólamaturinn er klár og ég get ekki beðið eftir að halda fyrstu jólin okkar hérna á Laugarnesveginum, með lifandi tré og öllu sem því fylgir. Jólakortin eru komin úr prentun en fjöldinn slær öll met í ár, sökum brúðkaupsins að sjálfsögðu. Aldrei þessu vant er húsbóndinn með langan jólagjafalista svo hann verður ekki vandamál þetta árið.

Vikan er þéttskipuð enda lítið sem komst í verk um helgina. Á morgun ætlar Álfurinn og Eldur að koma og baka piparkökur með okkur Áru og það verður eflaust brjáluð stemning ef ég þekki okkur rétt.

Fyrir streptó hafði ég hugsað mér að fara í Powerade hlaupið á fimmtudagskvöldið en ég er svona enn að melta það, þetta eru 10 km og ég myndi vilja vera betur æfð en ég læt þetta ráðast.

AFO fór á Jiu Jitsu æfingu og ætlaði síðan að koma færandi hendi með ís og detta beint í So You Think You Can Dance með mér:)

Æj hvað mér finnst bloggið mitt alltaf notalegt.

2009-12-06T11:00:00.003Z

Og viti menn, við eigum hálfs árs brúðkaupsafmæli í dag - til hamingju við:)

Alltaf hægt að finna tilefni til að fagna.

2009-12-06T09:50:00.002Z

Gullkorn litlu konunnar...

Við erum alltof ódugleg að skrá niður gullkornin sem vella upp úr dóttur okkar þessa dagana. Hún kemur sífellt með einhverjar skemmtilegar pælingar og mjög oft ansi fyndnar.

Þessi helgi fór í strepókokka hjá mér en núna er pensilínið að byrja að kikka inn og verkirnir aðeins að mýkjast. Andri var því með dömuna í fullu prógrammi í gær sem endaði á sundferð þar sem Ára spurði pabba sinn í klefanum hvort hann hefði verið að kúka með typpinu sínu! Hún spurði það hátt að næsti maður snéri sér við og sagði að þetta væri ansi góð pæling hjá henni!

Síðan skreið hún upp í til okkar í morgun til að kúra aðeins, ég stökk aðeins fram og á meðan hvíslaði hún að pabba sínum: "Pabbi, þú ert góður kall!" Krúttið sem hún er þessi elska.

2009-12-04T15:29:00.002Z

Mig langar í þrennt í jólagjöf...

Púlsmæli með GPS
66 norður úlpu
Nýja myndavél

Alveg verst hvað þetta eru helvíti dýrir hlutir. Þarf greinilega að hugsa gjafalistann upp á nýtt!

Annars var ég heima í dag, eitthvað slen í mér og ég fattaði að ég hef verið að sleppa C-vítamíninu undanfarið, þar kemur skýringin á hálsbólgunni.

Vona að ég hristi þetta af mér fyrir morgundaginn, langar eitthvað svo óskaplega mikið að gera eitthvað afslappandi og skemmtilegt um helgina. Jafnvel klára jólagjafainnkaup fyrir systur mínar.

2009-11-29T23:47:00.002Z

"Fyrsti í aðventu"

Við eyddum helginni með þessu dásamlega fólki í bústað á Flúðum. Þar gerðu konur, menn og dætur vel við sig í mat og drykk, ásamt því að slaka vel á og nýta hverja mínútu til hvíldar og svefns! Ferðin bar þess þó merki að með í för voru tvær orkumiklar stúlkur og þar af leiðandi fóru allir snemma að sofa og síðan að sjálfsögðu snemma á fætur. Á meðfylgjandi mynd er verið að nýta síðustu afganga af öllu matarkyns sem var m.a síld í sinnepssópu, roast beaf salat, nautalund með soyasósu, wasabi og engifer, ostar, vínber og jólaöl. Þetta er lífið krakkar mínir:)

Þegar heim kom tók við afar "óaðventulegt heimili" og engin brjálæðisleg stemning til að fara að græja það eftir að búið var að ganga frá öllu ferðadótinu en með sameiginlegu átaki okkar hjóna (og mömmu með því að gefa seríuna) og auðvitað splunkunýrri verkfæratösku sem hefur að geyma allt sem þarf til að festa upp meðfylgjandi seríu er heimilið okkar orðið afar jólalegt og búið að kveikja á fyrsta kerti aðventunnar. Að loknu verki skáluðum við í einum jólatuborg - minna má það nú varla vera. Fleiri bústaðamyndir á morgun! Aðíós.